සැප්තැම්බර් මස 15 වැනි ඉරුදින දිවයින පුරා විවිධ පාසල් කේන්ද්‍ර කරගනිමින් පැවැත්වූ 2024 – 5 ශ්‍රේණිය ශිෂ්‍යත්ව විභාගයේ පළමු ප්‍රශ්න පත්‍රය විභාගයට පෙර දිනයේ දී පිටවීමේ සිදුවීමට එරෙහිව දිවයිනේ විවිධ ප්‍රදේශවල දෙමාපියන් එක් ව උද්ඝෝෂණ ආරම්භ කර තිබෙනවා.
අද (18) පෙරවරුවේ කෑගල්ල කලාප අධ්‍යාපන කාර්‍යාලය ඉදිරිපිටදී ද එම කලාපයේ දෙමාපියන් පිරිසක් උද්ඝෝෂණයේ නිරත වූ බවටයි අප වාර්තාකරු පැවසුවේ.
විරෝධතාකරුවන් පවසන්නේ 5 ශ්‍රේණිය ශිෂ්‍යත්ව විභාගයේ ප්‍රශ්න පත්‍රයේ පළමු කොටස විභාගය පැවැත්වීමට පෙර දින රාත්‍රියේ (සැප්තැම්බර් 14) වට්ස් ඇප් සමූහ හරහා පිළිතුරු සමග බෙදා හැර ඇති බවයි.
මෙවැනි ම සිදුවීමක් අනුරාධපුරයෙන් ද වාර්තා වූ අතර වරකාපොළ සහ අලව්ව යන ප්‍රදේශවල ගුරුවරු පිරිසක් ද මෙලෙස කලින් දිනයේ දී රාත්‍රියේ අමතර පන්ති පවත්වමින් ප්‍රශ්න පත්‍රය දරුවන් සමග සාකච්ඡා කර ඇති බවයි වාර්තා වන්නේ.
ඒ අනුව ගාල්ල, කෑගල්ල, වරකාපොළ, අලව්ව සහ පූගොඩ යන ප්‍රදේශවල මෙලෙස විරෝධතා සංවිධානය කර තිබෙනවා.
මෙම නීතිවිරෝධී ක්‍රියාවට දැඩි දඬුවම් ලබාදෙන ලෙසත්; අසාධාරණයට ලක් වූ තම දරුවන්ට යළිත් ශිෂ්‍යත්ව විභාගය පවත්වන ලෙසටත් තම දරුවන් යළිත් විභාගයට පෙනී සිටීමට සූදානම් බවත් විරෝධතාකරුවන් පවසනවා.
මේ අතර අද පෙරවරුවේ අසාධාරණයට ලක් වූ වරකාපොළ සහ අලව්ව ප්‍රදේශවල දරුවන්ගේ දෙමාපියන් පිරිසක් සිදුවීම සම්බන්ධයෙන් පැමිණිල්ලක් කිරීමට බත්තරමුල්ල පිහිටි විභාග දෙපාර්තමේන්තුව වෙත පැමිණෙන බවත් වාර්තා වනවා.
දරුවන්ට උනේ අසාධාරණයක්, මගේ දරුවත් ලිව්වා, ඒත් මේ ප්‍රශ්නය නිසාම ආය පේපර් ලියන්න දීලා දරුවො අසරණ වෙනවා නේද?මේ වෙනකල් පැවැත්වුණ විභාග කීපයකටම මෙහෙම උනානෙ, ඒත් පිළිතුරක් නෑ හරියට. මේ ප්‍රශ්නය නිසා දරුවො මානසිකව වට්ටන්න එපා දෙමව්පියනෙ