සංචාරක බංග්ලාදේශ කණ්ඩායම සහ ශ්‍රී ලංකාව අතර අද (25) කොළඹ එස්.එස්.සී ක්‍රීඩාංගණයේ දී ආරම්භ වූ දෙවැනි හා අවසන් ටෙස්ට් තරගයේ පළමු දිනය නිමාවට පත් වන විට බංග්ලාදේශය කඩුලු 08ක් දැවී ලකුණු 220ක් ලබාගෙන සිටියා.
තරගයේ කාසියේ වාසිය දිනූ නායක ෂැන්ටෝ පළමු ව පන්දුවට පහරදීමට තීරණය කළ අතර, ඒ අවසරයෙන් බංග්ලාදේශ පිතිකරුවන් ශක්තිමත් අත්තිවාරමක් ලකුණු පුවරුව මතින් ගොඩනැගීමටයි උත්සාහ දැරුවේ.
නමුත් බංග්ලාදේශය වෙනුවෙන් සාර්ථක ලකුණක් ගොඩනගමින් සිටි ශඩ්මන් ඉස්ලාම් ලකුණු 46ක් අතැතිව සිටියදී පිටියෙන් ඉවත් කිරීමට තරිඳු රත්නායක සමත් වූ අතර අනමුල් හක් කිසිදු ලකුණක් ලැබීමටත් පෙර අසිත ප්‍රනාන්දුගේ පන්දුවක් හමුවේ දැවී ගියා.
මුෂ්ෆිකර් රහීම් (35) හා ලිටන් දාස් (34) හොඳින් පන්දුවට පහරදෙමින් සිටියදී ශ්‍රී ලංකාව වෙනුවෙන් අද ජාත්‍යන්තර ටෙස්ට් වරම් දිනූ තුන් ඉරියව් ක්‍රීඩක සොහාන් දිනූෂගේ පන්දු හමුවේ මෙම ප්‍රබලයින් දෙදෙනාව ම දවා ගන්නට දිනූෂ සමත් වීම ම කැපී පෙනුණා.
ඉන් අනතුරුව ස්ථාවර වෙමින් සිටි මෙහිඩි හසන් ව ලකුණු 31කට යළි ක්‍රීඩාගාරයේ අසුනක් මතට හරවා යවන්නට විශ්ව ප්‍රනාන්දුට හැකි වුණු අතර තරගය නිමාවන විට 09 වැනි කඩුල්ල වෙනුවෙන් පිටියේ රැඳී සිටියේ ටයිජුල් ඉස්ලාම් සමගින් එබඩොට්.
කඩුලු බිඳ දැමීමේ දී විශ්ව ප්‍රනාන්දු, සොනාල් දිනූෂ හා අසිත ප්‍රනාන්දු කඩුලු දෙක බැගින් හා ධනංජය සිල්වා එක් කඩුල්ල බැගින් බිඳ දැමුවා.
හෙට (26) තරගයේ දෙවැනි දිනයයි.
