මල්වතු ඔය ද්රෝණියේ ඉහළ සහ පහළ ප්රදේශවලට ඇදහැලුණු සැලකිය යුතු වර්ෂා පතනය හේතුවෙන් පහළ ධාරා ප්රදේශයේ තන්තිරිමලේ සිට පහළ ප්රදේශවල ඔයෙහි ජල මට්ටම ගංවතුර මට්ටමට ආසන්නව පවතින බව වාරිමාර්ග දෙපාර්තමේන්තුව නිවේදනය කරනවා.
එම දෙපාර්තමේන්තුව පැවසුවේ මෙම තත්ත්වය හේතුවෙන් ද්රෝණියේ පහළ ප්රදේශවල පිහිටි වෙන්ගලචෙඩ්ඩිකුලම්, මඩු, මුසාලෛ, නැනඩ්ඩාන් යන ප්රාදේශීය ලේකම් කොට්ඨාසවලට අයත් ගංවතුර නිම්නයේ පහළ ප්රදේශවලට ගංවතුර තත්ත්වයක් ඇති විය හැකි බවයි.
මෙම තත්ත්වය සම්බන්ධයෙන් දැඩි සැළකිල්ලකින් කටයුතු කරන ලෙසත්, එම ප්රදේශවල පදිංචි මහජනතාවට සහ ප්රදේශ හරහා ගමන් ගන්නා රථ වාහන රියදුරන්ගෙන් ඉල්ලා සිටින බව ද වාරිමාර්ග දෙපාර්තමේන්තුව වැඩිදුරටත් දැනුම් දෙනවා.
මේ අතර ආපදා කළමනාකරණ මධ්යස්ථානය සඳහන් කළේ පවතින අධික වැසි සහිත කාලගුණික තත්ත්වය හේතුවෙන් දිස්ත්රික්ක කිහිපයකට බලපෑම් එල්ල වී ඇති බවයි.
ඒ, අනුව අනුරාධපුර, කිලිනොච්චි, කෑගල්ල සහ ගාල්ල යන දිස්ත්රික්කවලට මෙලෙස බලපෑම් එල්ල වී ඇති බවයි එම මධ්යස්ථානය සඳහන් කළේ.
එම දිස්ත්රික්කවල පවුල් 319කට අයත් පුද්ගලයින් 603 දෙනෙකු පීඩාවට පත්ව ඇති අතර, නිවාස 04ක් අර්ධ වශයෙන් හානි වී ඇති බව ද සඳහන්.
ඊට ආමතරව එම දිස්ත්රික්කවල පවුල් 71කට අයත් පුද්ගලයින් 200 දෙනෙකු තවදුරටත් ආරක්ෂිත ස්ථාන වෙත යොමුකර ඇති බවයි ආපදා කළමනාකරණ මධ්යස්ථානය වැඩිදුරටත් පැවසුවේ.
