පාර්ලිමේන්තු මන්ත්රී අනුර කුමාර දිසානායක ඇතුළු පුද්ගලයින් 26 දෙනෙකුට අද උද්ඝෝෂණ සහ පෙළපාලි පැවැත්වීම වළක්වාලමින් නියෝගයක් ලබාදී තිබෙනවා.
අද පස්වරු 1 සිට රාත්රී 8 දක්වා කාලය තුළ දී කොටුව පොලිස් වසමට අදාළ මාර්ගවල අවහිරතාවක් සහ මාර්ගවල ගමන් ගන්නා වාහනවලට බාධා කිරීම් නොකරන ලෙසට කොටුව මහෙස්ත්රාත් අධිකරණය මඟින් අධිකරණ අඥාවක් නිකුත් කර ඇති බවද පොලිස් මාධ්ය ප්රකාශක ජ්යෙෂ්ඨ පොලිස් අධිකාරි නීතිඥ නිහාල් තල්දුව මහතා ප්රකාශ කළා.
කළහකාරී ලෙස හැසිරෙමින් රාජ්ය දේපළවලට හෝ මහජනතාවට හානි සිදු කරන්නේ නම් දණ්ඩ නීති සංග්රහය, පොලිස් ආඥා පනත, මංමාවත් පනත හා මැතිවරණ පනත යටතේ ක්රියාකරන ලෙසයි අධිකරණය විසින් පොලිසියට උපදෙස් ලබා දී ඇත්තේ.
පොලිසිය කළ ඉල්ලීමකට අනුව අධිකරණය මෙම නියෝගය නිකුත් කර තිබෙනවා.
ඒ අනුව ඉහත නම් කළ සියලුදෙනාට හා උද්ඝෝෂකයින්ට ජනාධිපති ලේකම් කාර්යාලය, ජනාධිපති මන්දිරය, මුදල් අමාත්යාංශය සහ ගාලුමුවදොර පිටිය පරිශ්රය ඇතුළු නම් කරන ලද ස්ථාන කිහිපයකට ඇතුළුවීමෙන් වළකින ලෙසට ද අධිකරණය දැනුම් දී තිබෙනවා.
අධිකරණය විසින් නිකුත් කර ඇති මෙම ආඥාව කඩ කිරීම දඩුවම් ලැබිය හැකි වරදක් බවටයි වැඩිදුරටත් දැනුම්දී ඇත්තේ.
පළාත් පාලන මැතිවරණය කල් දැමීමට එරෙහිව ජාතික ජනබලවේගය සංවිධානය කරන මෙම විරෝධතාව අද (26) කොළඹදී පැවැත්වීමට නියමිතයි.
විරෝධතාවය අද පස්වරු 2.30ට කොළඹ විහාරමහා දේවී උද්යානය අසලින් ආරම්භ කිරීමටයි සැලසුම් කර ඇත්තේ.
