spot_img
spot_img
spot_img
AFC Banner
Empty Ad
Empty Ad

අධිකරණයට අපහාස කළ අජිත් ප්‍රසන්නට බරපතළ වැඩ සහිත සිර දඬුවම්

අධිකරණයට අපහාස කිරීමේ චෝදනාවට වරද පිළිගත් විශ්‍රාමික යුද හමුදා මේජර් අජිත් ප්‍රසන්තට අභියාචනාධිකරණය විසින් අද මාස හයක බරපතළ වැඩ සහිත සිරදඬුවම් නියම කළා.

එම සිර දඬුවම අජිත් ප්‍රසන්න දැනට ගෙවමින් සිටින වසර හතරක සිර දඬුවම් කාලය අවසන් වීමෙන් පසුව ක්‍රියාත්මක වන බවයි තීන්දුවේ සඳහන් වූයේ.

අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත විනිසුරු මඩුල්ල විසින් මෙම තීන්දුව ලබා දී තිබෙනවා.

වගඋත්තරකාර අජිත් ප්‍රසන්න මින්මතුවට අධිකරණයට අපහාස වන ආකාරයේ ප්‍රකාශ සිදු නොකරනු ඇතැයි තමන් විශ්වාස කරන බව තීන්දුව ප්‍රකාශයට පත් කරමින් අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න මහතා විවෘත අධිකරණයේ ප්‍රකාශ කළා.

මෙම සිර දඬුවම් වලින් නිදහස් වී ගිය දිනයක අධිකරණය විවේචනය වන ආකාරයේ ප්‍රකාශ සිදු නොකළ යුතු බවටත් මෙහිදී විනිසුරුවරයා විසින් වගඋත්තරකාර අජිත් ප්‍රසන්නට තරයේ අවවාද කර තිබෙනවා.

2019 වසරේ දෙසැම්බර් මස 6 වනදා සහ 8 වනදා යූටියුබ් නාලිකා ඔස්සේ මහේස්ත්‍රාත්වරු කිහිපදෙනකුගේ තීරණ සම්බන්ධයෙන් සිදු කළ ප්‍රකාශවලින් අධිකරණයට අපහාස කළේ යැයි චෝදනා කරමින් නීතිපතිවරයා විසින් වගඋත්තරකාර අජිත් ප්‍රසන්නට එරෙහිව චෝදනා දෙකක් යටතේ චෝදනා පත්‍ර ගොනු කර තිබුණා.

එම චෝදනාවලට වරද පිළි ගනිමින් අධිකරණයට දිවුරුම් ප්‍රකාශයක් ලබා දුන් අජිත් ප්‍රසන්න තමන් මින් මතුවට අධිකරණයට අපහාස වන ආකාරයේ ප්‍රකාශ සිදු නොකරන බවට ප්‍රතිඥාවක් ලබාදී තිබුණා.

දිවුරුම් ප්‍රකාශයක් තුළින් ලබාදී තිබු එම ප්‍රතිඥාව සලකා බැලූ අභියාචනාධිකරණ විනිසුරු මඩුල්ල අධිකරණයට අපහාස කිරීම සම්බන්ධයෙන් එල්ල කර තිබූ චෝදනා දෙකකට සැකකරු වරදකරු කරන බව තීරණය කළා.

ඒ අනුව එක් එක් චෝදනාවට මාස 6 බැගින් මාස 12ක සිරදඬුවම් නියම කළ අභියාචනාධිකරණ විනිසුරු මඩුල්ල එම සිර දඬුවම මාස 6කින් ගෙවී යා යුතු බවට නියෝග කර සිටියා.

අජිත් ප්‍රසන්න දැනට විඳිමින් සිටින වසර හතරක සිර දඬුවම අවසන් වීමෙන් පසුව මෙම මාස හයක සිර දඬුවම ක්‍රියාත්මක වීම ආරම්භ වන බවත් තීන්දුවේ සඳහන් වුණා.

අධිකරණයට අපහාස කිරීමේ චෝදනාව සම්බන්ධයෙන් වරදකරු කරනු අජිත් ප්‍රසන්නට මීට පෙර ශ්‍රේෂ්ඨාධිකරණය විසින් වසර 04ක සිර දඬුවම් නියම කර තිබුණා.

ඔබේ ප්‍රතිචාරය කුමක්ද ?
+1
0
+1
1
+1
7
+1
1
+1
4
+1
0
+1
0
Subscribe
Notify of
0 Comments
Inline Feedbacks
සියලු ප්‍රතිචාර බලන්න !

?