ජංගම දුරකතනයෙන් තවත් පුද්ගලයකු සමග පරුෂ වචනයෙන් ආවේගශීලී සංවාදයක යෙදෙද්දී ඊට මැදිහත්වූ පියාට ඔහුගේ 23 හැවිරිදි බාල පුතු විසින් සිදුකළ පහරදීමෙන් පසුගියදා ජීවිතක්ෂයට පත්වීමේ පුවතක් කුරුණෑගල මූලස්ථාන පොලිසියේ අපරාධ විමර්ශන අංශයෙන් වාර්තා වනවා.
බාල පුතා ජංගම දුරකතනයෙන් ශබ්ද නඟා තවත් අයෙකුට අසැබි ලෙස කතා කිරීම නුසුදුසු බවට අවවාද කළත්, එය ප්රතික්ෂේප කිරීම නිසා බාල පුතුට පියා විසින් පහරදී ඇති අතර ඊට උරණ වූ ඔහු සිය පියාව තල්ලුකර පෙරළා පහරදීම නිසා පියා නිවසෙන් පිටවී වැඩිමල් පුතුගේ නිවසට දිවගොස් තිබෙනවා.
දිවයන පියාව ලුහුබැඳ ගිය බාල පුතා කනප්පුවකින් ඔහුට පහරදී ඇති අතර පහරදීමත් සමග ඇදවැටුණ පියා ‘‘පුතේ මට ගහන්න එපා’’ යැයි කෑගසා ඇත.
මියගිය අයගේ බිරිඳ සහ වැඩිමල් පුතු විසින් සිහිසුන්ව සිටි පියා කුරුණෑගල ශික්ෂණ රෝහලට ඇතුළත් කිරීමේදී ජීවිතක්ෂයට පත්වී සිටි බව රෝහලේ වෛද්යවරු පවසා ඇත.
පියාගේ හදිසි මරණය සම්බන්ධයෙන් සැකපිට අත්අඩංගුවට ගත් බාල පුතා කුරුණෑගල මහෙස්ත්රාත් අධිකරණයේ නියෝග මත රක්ෂිත බන්ධනාගාර ගතකළ බව කුරුණෑගල මූලස්ථාන පොලිසියේ අපරාධ විමර්ශන අංශය සඳහන් කර සිටියේ.
තිදරු පියෙකු වූ මියගිය අය කුරුණෑගල ශික්ෂණ රෝහලේ උපස්ථායකයකු ලෙස සේවය කර ඇති අතර ඔහු තව දින කීපයකින් විශ්රාම යෑමට නියමිතව තිබු බවයි වාර්තා වන්නේ.
පශ්චාත් මරණ පරීක්ෂණයේදී කුරුණෑගල ශික්ෂණ රෝහලේ විශේෂඥ අධිකරණ වෛද්ය නිලධාරියාගේ
නිගමනය වූයේ මියගිය අය අධික පීඩනයකට පත්වීමත්, හෘද රෝගයෙන් පෙළීමත් නිසා මියගිය බවයි.