රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත ඉතා දරුණු පනතක් බවට විශේෂඥයින් මත පළ කරනවා.
විශේෂඥයින් පවසන්නේ මෙම නව පනත් කෙටුම්පත මඟින් ලබාදෙන ඇතැම් බලතල අනාගතයේ වැරදි ලෙස භාවිත කළහොත් සාමාන්‍ය ජනතාවගේ නිදහස, අදහස් ප්‍රකාශ කිරීමේ අයිතිය, මාධ්‍ය නිදහස සහ පුද්ගලයන් අත්අඩංගුවට ගැනීම හා රඳවා තබාගැනීම සම්බන්ධයෙන් ගැටලු ඇතිවිය හැකි බවයි.
මෙම පනත යටතේ අත්අඩංගුවට ගනු ලබන පුද්ගලයින් පොලිසියට ඉතා පහසුවෙන් වසරකට වඩා වැඩි කාලයක් නීතියේ සහ අධිකරණයේ රැකවරණයෙන් ඉවත්කර රඳවා තබා ගැනීමට අවසර හිමිවීම මෙහි ප්‍රධානතම අඩුපාඩුව බවට ඔවුන් පෙන්වා දෙනවා.
එමෙන්ම දැනට පවතින ත්‍රස්තවාදය වැළැක්වීමේ පනත මඟින් ශ්‍රී ලංකා පොලිසිය වෙත ලබාදී ඇති බලතවලට වඩා වැඩි බලතල ප්‍රමාණයක් රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත මඟින් ලබාදී ඇති බවත් විශේෂඥයින් පවසනවා.
ඒ, අනුව සෑම පොලිස් නිලධාරියෙකුටම පුද්ගලයින් අත්අඩංගුවට ගැනීමේ විශේෂ බලතල මෙම නව පනත් කෙටුම්පත හරහා ලබාදී ඇති බවත්, එවැනි අහිතකර වූ විශේෂ බලතලයක් දැනට ක්‍රියාත්මක ත්‍රස්තවාදය වැළැක්වීමේ පනත මඟින් ලබාදී නොමැති බවයි ඔවුන් අවධාරණය කරන්නේ.
ඒ, අනුව පුද්ගලික තරහකට හෝ වෙනත් උවමනාවකට ඕනෑම පුද්ගලයෙක් අත්අඩංගුවට ගැනීමේ ආදානමක් මෙම රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත හරහා පවතින බවයි විශේෂඥයින් වැඩිදුරටත් පෙන්වා දෙන්නේ.
වසර 40ක් වැනි කාලයක සිට ක්‍රියාත්මක වන ත්‍රස්තවාදය වැළැක්වීමේ පනතට වඩා දරුණු වූ රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත මඟින් තවත් වසර දහයක් විස්සක් වැනි කාලයක් තුළ මෙහි වින්දිතයින් රාශියක් බිහිවනු ඇති බවට සැකයක් නොමැති බවට විශේෂඥයින් අනතුරු අඟවා සිටිනවා.
එමෙන්ම රාජ්‍යය ත්‍රස්තවාදයෙන් ආරක්ෂා කිරීමේ නව පනත් කෙටුම්පත මඟින් ‘ත්‍රස්තවාදය’ නැමැති වරද අර්ථ නිරූපනය කර ඇති ආකාරයේ විශාල අපැහැදිලි තාවයක් පවතින බවයි ඔවුන් පෙන්වා දෙන්නේ.
ඒ, තුළින් ද බරපතළ හානියක් සිදුවිය හැකි බවයි එම විශේෂඥයින් පවසන්නේ.
ත්‍රස්තවාදියා සහ ආණ්ඩුව විවේචනය කරන සාමාන්‍ය පුද්ගලයා අතර ලොකු වෙනසක් ඇති බවත්, එම වෙනස නීතිය තුළ ඉතා පැහැදිලිව තිබිය යුතු බවයි ඔවුන්ගේ මතය වී ඇත්තේ.
ඒ, අනුව හඳුන්වාදීමට යන රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත තුළින් ඉතා විශාල හානියක් මෙරට ජනතාවට සිදුවන බව විශේෂඥයින් වැඩිදුරටත් පවසනවා.
රටේ ආරක්ෂාව මෙන්ම ජනතාවගේ නිදහස ද අවශ්‍ය බව පෙන්වා දෙන විශේෂඥයින් මෙවැනි පනතක් ගෙන ඒමට ආණ්ඩුව කටයුතු කළහොත් ආණ්ඩුවවට විරුද්ධව නැඟී සිටින බවයි ඔවුන් අවධාරණය කර සිටියේ.
