අලුත් අවුරුද්ද සඳහා තම ගම්බිම් බලා ගොස් කොළඹ සහ තදාසන්න ප්‍රදේශ වෙත නැවත පැමිණෙන මහජනතාව සඳහා විශේෂ ප්‍රවාහන සේවා අද (19) දිනයේදීත් ක්‍රියාත්මක වනවා.
සති අන්තයේ දිනයක් වන අද (19) දිනයේ සහ හෙට (20) දිනයේ දී මගීන් විශාල සංඛ්‍යාවක් පැමිණෙනු ඇතැයි අපේක්ෂා කරන බැවින්, විශේෂයෙන් අධිවේගී මාර්ග සඳහා අමතර බස් සේවා ක්‍රියාත්මක බවයි ජාතික ප්‍රවාහන කොමිෂන් සභාව සඳහන් කළේ.
මොණරාගල, ඇඹිලිපිටිය, බදුල්ල, බණ්ඩාරවෙල, අම්පාර සහ නුවරඑළිය ඇතුළු ප්‍රදේශවලින් විශේෂ සේවා ක්‍රියාත්මක වන බවයි ජාතික ගමනාගමන කොමිෂන් සභාව වැඩිදුරටත් සඳහන් කර සිටියේ.
එමෙන්ම අධිවේගී මාර්ග ඔස්සේ ක්‍රියාත්මක බස් සේවා මඟින් කොළඹට පැමිණෙන ජනතාව හෙට (20) උදෑසන කාලයේ දී වැඩි වශයෙන් පැමිණෙනු ඇති බවට අපේක්ෂා කළ හැකි බවයි ජාතික ගමනාගමන කොමිෂන් සභාවේ අධ්‍යක්ෂ (ධාවන) ෂෙරින් අතුකෝරළ පැවසුවේ.
මේ අතර, පවතින මගී ඉල්ලුම මත පිට පළාත්වලින් කොළඹට පැමිණීමට අමතර බස් රථ යෙදවීමට පළාත් ප්‍රවාහන අධිකාරීන් වෙත අවශ්‍ය අවසර ලබා දී ඇති බවත් ඇය වැඩිදුරටත් සඳහන් කළා.
මේ අතර දුම්රිය දෙපාර්තමේන්තුව ද අද (19) දිනයේදීත් විශේෂ දුම්රිය කිහිපයක් ධාවන කරන බවයි පැවසුවේ.
මෙම විශේෂ දුම්රිය අනුරාධපුර, කන්කසන්තුරේ, මාතර සහ බෙලිඅත්ත ප්‍රදේශවලින් කොළඹ දක්වා ධාවනය කෙරෙනවා.
