මීටියාගොඩ පොලිස් වසමේ බද්දේගම පාර, මානම්පිට ප්රදේශයේ පිහිටි 86 අවන්හලේ ඊයේ (03) රාත්රියේ වෙඩි තැබීමක් සිදුව තිබුණා.
මෙම වෙඩි ප්රහාරයෙන් එක් පුද්ගලයෙක් ජීවිතක්ෂයට පත්ව තවත් අයෙක් බරපතළ තුවාල ලබා මේ වනවිට බලපිටිය රෝහලේ ප්රතිකාර ලබනවා.
මෙම වෙඩි තැබීමෙන් ජීවිතක්ෂයට පත්ව ඇත්තේ මීටියාගොඩ, මානම්පිට ප්රදේශයේ පදිංචිව සිටි සරත් චමින්ද උදය කුමාර නැමති 47 හැවිරිදි පුද්ගලයෙක්.
තුවාල ලබා සිටින පුද්ගලයා මහදුර නලින් වසන්ත නැමැති 52 හැවිරිදි වියේ පසුවන අයෙක් බවයි පොලිසිය පැවසුවේ.
මෙම වෙඩි තැබීම; තුවාලකරු වන මහදුර නලින් වසන්ත යන පුද්ගලයා සහ මෙවර අම්බලන්ගොඩ ප්රාදේශිය සභාවට ස්වාධීන කණ්ඩායමකින් තරග වදින මහදුර ඉසුරු දිල්ෂාන් යන පුද්ගලයා ඉලක්ක කර සිදුකර ඇති බවට අනාවරණය වී තිබෙනවා.
මෙම වෙඩි තැබීමෙන් තුවාල ලැබූ මහදුර නලීන් යන අය 2015 වර්ෂයේ දී පුද්ගලික ආරවුලක් මත, වෙඩි තබා ද්විත්ව ඝාතනයක් සිදුකිරීමේ සිද්ධියක සැකකරුවකු බවයි තොරතුරු අනාවරණය වී ඇත්තේ.
මේ අතර වෙඩි තැබීම සිදු වූ අවන්හල් හිමිකරු ද අදාළ ස්වාධීන කණ්ඩායමෙන් අම්බලන්ගොඩ ප්රාදේශිය සභාවට තරග කරන අයෙක් බවට ද තොරතුරු වාර්තා වනවා.
යතුරුපැදි දෙකකින් පැමිණි නාදුනන පුද්ගලයන් සිව්දෙනෙකු විසින් ටී-56 වර්ගයේ ගිනි අවියකින් මෙම වෙඩි තැබීම සිදුකර පළාගොස් ඇති බවයි පොලිසිය සඳහන් කළේ.
කෙසේ වෙතත් මෙම වෙඩි තැබීම දේශපාලන හේතුවක් මත සිදු වූ බවට තවමත් තොරතුරු අනාවරණය වී නැහැ.
සිද්ධිය සම්බන්ධයෙන් මීටියාගොඩ පොලිසිය වැඩිදුර පරීක්ෂණ පවත්වනු ලබනවා.
