මීගමුව බන්ධනාගාරය තුළ අද (06) ඇති වූ ගැටුමෙන් තුවාල ලබා මීගමුව දිස්ත්‍රික් රෝහල වෙත ඇතුළත් කළ රෝගීන්ගෙන් බරපතළ තත්ත්වයේ පසු වූ රෝගීන් 14 දෙනෙකු කොළඹ ජාතික රෝහල වෙත මාරුකර යැවූ බව මීගමුව දිස්ත්‍රික් රෝහලේ අධ්‍යක්ෂ විශේෂඥ වෛද්‍ය පුෂ්පා ගම්ලත්ගේ මහත්මිය සඳහන් කළා.
බරපතළ තත්ත්වයේ පසු වන තවත් රෝගීන් හයදෙනෙකු පමණ ජාතික රෝහල වෙත මාරුකර යැවීමට මේ වනවිටත් කටයුතු කරමින් සිටින බවයි අධ්‍යක්ෂවරිය පැවසුවේ.
මේ අතර අද (06) පෙරවරුවේ ඇති වූ ගැටුමෙන් බන්ධනාගාර නිලධාරීන් ඇතුළුව 25 දෙනෙකු මියගොස් තිබෙනවා.
මියගිය 25 දෙනා අතර බන්ධනාගාර නිලධාරීන් 05 දෙනෙක් සහ රැඳවියන් 20 දෙනෙකු සිටිනවා.
සිද්ධියෙන් තුවාල ලැබූ තුවාලකරුවන් 100 දෙනෙකු පමණ මීගමුව දිස්ත්‍රික් රෝහල වෙත පළමුව ඇතුළත් කෙරුණා.
