ඇමරිකානු ජනාධිපති ඩොනල්ඩ් ට්‍රම්ප් සහ ඔහුගේ බිරිඳ මෙලනියා ට්‍රම්ප්ගේ ප්‍රධානත්වයෙන් පැවැත්වෙමින් තිබූ ධවල මන්දිර වාර්තාකරුවන්ගේ සංගමයේ වාර්ෂික රාත්‍රී භෝජන සංග්‍රහය අතරතුර සිදු වූ වෙඩි තැබීමෙන් කිසිවෙකුටවත් හානියක් සිදුව නොමැති බව විදෙස් මාධ්‍ය මේ වනවිට වාර්තා කරනවා.
වොෂින්ටනයේ ‘වොෂින්ටන් හිල්ටන්’ හෝටලයේ පැවැත්වෙමින් තිබූ මෙම රාත්‍රී භෝජන සංග්‍රහය අවලංගු කිරීමට මේ වනවිට කටයුතු කර ඇති අතර, උත්සවය ප්‍රමාද කර නැවත දින 30ක් ඇතුළත පවත්වන ලෙසයි ට්‍රම්ප් ජනාධිපතිවරයා උපදෙස් දී ඇත්තේ.
සිද්ධියේ පසු ජනාධිපති ට්‍රම්ප් සහ ආර්යාව වොෂින්ටන් හිල්ටන් හෝටලයෙන් ආරක්ෂිතව පිටව ගොස් ඇති බවයි වාර්තා වුණේ.
එමෙන්ම ට්‍රම්ප්ගේ ආරක්ෂක කණ්ඩායම සැකකාර තුවක්කුකරු උත්සව ශාලාවෙන් පිටතදී අත්අඩංගුවට ගත් බවත් කිසි විටෙකත් ඔහු උත්සවයට ඇතුළු නොවූ බවත් ධවල මන්දිර වාර්තාකරු සංගමයේ මණ්ඩල සාමාජිකා කෝට්නි සුබ්‍රමනියන් පවසනවා.
මේ අතර ඩොනල්ඩ් ට්‍රම්ප් ධවල මන්දිරයෙන් පිටත දී මාධ්‍ය ඇමතීමට නියමිත බවයි වාර්තා වුණේ.
