කටුනායක ගුවන් තොටුපොළෙන් අද (11) උදෑසන ගුවන් ගත වී ටික වේලාවකින් එන්ජිමක කුරුල්ලෙක් ගැටීම හේතුවෙන් කාර්මික දෝෂයකට ලක්ව පැය තුනකට වැඩි කාලයක් මීගමුව මුහුදු සීමාවට ඉහළ අහසේ සැරිසරමින් තිබූ තුර්කි ගුවන් සේවයට අයත් යානය කටුනායක ගුවන් තොටුපොළ වෙත මේ වනවිට සාර්ථකව ගොඩබස්වා තිබෙනවා.
තුර්කි ගුවන් සේවයට අයත් TK-731 දරණ මෙම ගුවන්යානය මගීන් 246ක් සමග අද (11) උදෑසන 7:07ට කටුනායක ජාත්යන්තර ගුවන්තොටුපොළින් තුර්කියේ ඉස්තාන්බුල් බලා යෑමට ගමන් අරඹා තිබුණා.
යානය එලෙස ගුවන් ගත වී ටික වේලාවකින් පසු එහි එන්ජිමක කුරුල්ලෙක් ගැටීමෙන් කාර්මික දෝෂයකට ලක්ව ඇති බවයි වාර්තා වුණේ.
මේ හේතුවෙන් යානය යළි කටුනායකට ගොඩබැස්සවීමට සූදානම් වුවද එහි ගබඩා කර තිබූ ඉන්ධන තොගය ඊට බාධාවක් වී තිබෙනවා.
ඒ, අනුව ගබඩාකර තිබූ ඉන්ධන දහනය කරමින් ආරක්ෂිතව ගොඩබෑමට අවශ්ය කටයුතු සකසා ගැනීමට යානයට පැය තුනකට වැඩි කාලයක් මීගමුව මුහුදු සීමාවට ඉහළ අහසේ සැරීමට සිදු වුණා.
පසුව එම යානය පෙරවරු 10.21ට පමණ කටුනායක ගුවන්තොටුපොළ වෙත ගොඩබැස්සවීමටයි එහි නියමුවන් කටයුතු කළේ.
මේ අතර හදිසි තත්ත්වයකට මුහුණදීම සඳහා කටුනායක ගුවන්තොටුපොළ ද සූදානම්කර තිබුණා.
