අතුරුගිරිය පොලිස් වසමේ අද (08) පෙරවරුවේ සිදුකළ වෙඩි තැබීමෙන් මිය ගිය සහ තුවාල ලැබූවන් සම්බන්ධ තොරතුරු රැසක් මේ වනවිට අනාවරණය වී තිබෙනවා.
මෙම වෙඩි තැබීමෙන් පුද්ගලයින් දෙදෙනෙක් ජීවිතක්ෂයට පත් වූ අතර, ඔවුන් දෙදෙනා වයස අවුරුදු 55 සහ 58 යන වයස්වල පසුවන්නන් බවයි පොලිසිය සඳහන් කළේ.
ඔවුන් කොළඹ 07 සහ අතුරුගිරිය යන ප්රදේශවල පදිංචිකරුවන්.
මෙලෙස ජීවිතක්ෂයට පත් වූ පුද්ගලයින් දෙදෙනා අතර ප්රසිද්ධ ව්යාපාරික සුරේන්ද්ර වසන්ත හෙවත් ක්ලබ් වසන්ත ද සිටිනවා.
මේ අතර සිද්ධියෙන් තුවාල ලැබූවන් අතර සිටි කාන්තාවක් සහ පිරිමි පුද්ගලයෙක් වැඩිදුර ප්රතිකාර සඳහා කොළඹ ජාතික රෝහලට ඇතුළත් කර තිබෙනවා.
එම කාන්තාව වෙඩි ප්රහාරයට ලක් වූ ජනප්රිය ගායිකා කේ.සුජීවා බවයි රෝහල් ආරංචි මාර්ග සඳහන් කළේ.
ඊට අමතරව තවත් කාන්තාවන් දෙදෙනෙක් හෝමාගම රෝහලේ මේ වනවිට ප්රතිකාර ලබන බවයි පොලිසිය පැවසුවේ.
මෙම වෙඩි තැබීම සඳහා වෙඩික්කරුවන් සුදු පැහැති මෝටර් රථයකින් පැමිණ ඇති බවයි පොලිසිය සඳහන් කළේ.
හිස්වැසුම් පැළඳ මුඛ ආවරණවලින් මුව ආවරණය කරගත් වෙඩික්කරුවන් දෙදෙනෙක් මෙම වෙඩි තැබීමට පැමිණ ඇති බවයි තොරතුරු වාර්තා වුණේ.
වෙඩික්කරුවන් විසින් ටී-56 වර්ගයේ ගිනි අවි 02ක් භාවිත කර වෙඩිතැබීම සිදුකර ඇති බවයි පොලිසිය වැඩිදුරටත් සඳහන් කළේ.
ව්යාපාරික ස්ථානයක් විවෘත කිරීමේ අවස්ථාවක දී මෙම වෙඩි තැබීම සිදුකර ඇති බවයි පොලිසිය පැවසුවේ.
මේ අතර මෙම වෙඩි තැබීමේ සිද්ධියට සම්බන්ධ මෝටර් රථය කඩුවෙල, කොරතොට ප්රදේශයේ දී පොලිසිය විසින් අද (08) දහවල් සොයාගෙන තිබෙනවා.
