ඊශ්‍රායලය සහ ඉරානය අතර ඉහළ යන ආතතීන් මධ්‍යයේ වසා දැමුණු ජෝර්දානය ගුවන් කලාපය යළි විවෘත කර තිබෙනවා.
ජෝර්දානයේ වේලාවෙන් අද (14) පෙරවරු 07:30ට සිය ගුවන් අවකාශය නැවත විවෘත කළ බවයි එරට සිවිල් ගුවන් සේවා කොමිසම සඳහන් කළේ.
ජෝර්දාන රජයේ ප්‍රකාශක මොහොමඩ් අල්-මොමානි පවසා තිබුණේ තම ගුවන් සීමාව උල්ලංඝනය කිරීමට කිසිම අවස්ථාවක ඉඩ නොදෙන බවත්, එය කිසිදු ගැටුමකට යුධ පිටියක් නොවන බවයි.
මේ අතර ඊයේ රාත්‍රියේ සිට අද (14) අලුයම් කාලය දක්වා ඉරාන විසින් ඊශ්‍රායලයට එල්ල එල්ල කළ බැලස්ටික් මිසයිල ප්‍රහාරවලින් පුද්ගලයින් දෙදෙනෙක් මියගොස් ඇති බව තහවුරු කර තිබෙනවා.
මීට අමතරව ඊශ්‍රායලයේ වෙරළබඩ තැනිතලා කලාපයේ පුද්ගලයින් 21 දෙනෙකු තුවාල ලබා ඇති බවයි ඊශ්‍රායල හදිසි සේවා අංශ පවසන්නේ.
මේ අතර ඉරානයේ ඉලක්ක වෙත ගුවන් ප්‍රහාර එල්ල කිරීම දිගටම සිදුකරගෙන යන බව ඊශ්‍රායල ආරක්ෂක හමුදා පවසනවා.
ටෙලිග්‍රෑම් වෙත පළ කරන ලද කෙටි ප්‍රකාශයක,ඊශ්‍රායල ආරක්ෂක පැවසුවේ, ඊශ්‍රායල ගුවන් හමුදාව ඉරානයේ තර්ජන ඉවත් කිරීම සඳහා ඉලක්ක වෙත අඛණ්ඩව ප්‍රහාර එල්ල කරන බවයි.
මේ අතර ඊශ්‍රායල ප්‍රහාර හේතුවෙන් කාන්තාවන් සහ ළමුන් ඇතුළු අවම වශයෙන් පුද්ගලයින් 78 දෙනෙකු මිය ගොස් තවත් 320 කට වැඩි පිරිසක් තුවාල ලබා ඇති බව ඉරානය පවසනවා.
ඉරානයට පහර දීමේ සහ ඉහළ පෙළේ හමුදා අණ දෙන නිලධාරීන් කිහිප දෙනෙකු සහ න්‍යෂ්ටික විද්‍යාඥයින් හයදෙනෙකු ඝාතනය කිරීමේ අපරාධයෙන් පසුව ඊශ්‍රායලයට දැඩි දඬුවම් අපේක්ෂා කරන බව ඉරානයේ උත්තරීතර නායක අයතුල්ලා අලි කමේනි අනතුරු අඟවා තිබෙනවා
මේ අතර ඊශ්‍රායල අගමැති බෙන්ජමින් නෙතන්යාහු පවසන්නේ අවශ්‍ය තාක් කල් හමුදා මෙහෙයුම දිගටම පවතිනු ඇති බවයි.
