මහවෙල ප්‍රදේශයේ හෝටලයක සංවිධානය කර තිබූ ෆේස්බුක් සාදයක් වටලා මත්ද්‍රව්‍ය සන්තකයේ තබාගෙන සිටි උප පොලිස් පරීක්ෂකවරයෙක් ඇතුළු හයදෙනෙකු අත්අඩංගුවට ගත් බව මහවෙල පොලිසිය පවසනවා.
ලැබුණු තොරතුරක් මත ඊයේ (01) රාත්‍රියේ මොවුන් පිරිස අත්අඩංගුවට ගෙන ඇති බවයි වාර්තා වුණේ.
අත්අඩංගුවට ගැනුණු සැකකරුවන් අතර සිටින උප පොලිස් පරීක්ෂකවරයා විසින් ෆේස්බුක් සමාජ මාධ්‍ය ඔස්සේ මෙම සාදය සංවිධානය කර තිබූ බවයි අනාවරණය වී ඇත්තේ.
අත්අඩංගුවට ගත් උප පොලිස් පරීක්ෂකවරයා ජයවර්ධනපුර පොලිස් විශේෂ කාර්ය බළකාය කඳවුරට අනුයුක්තව විශේෂ යතුරුපැදි අංශයේ රාජකාරී කරන නිලධාරියකු බවයි මහවෙල පොලිසිය සඳහන් කළේ.
අත්අඩංගුවට ගත් අනෙක් සැකකරුවන් අවුරුදු 25ත් 35ත් අතර වයස්වල පසුවන අයවලුන් බවයි වාර්තා වන්නේ.
මෙම සාදයට ඇතුළු වීම සඳහා එක් පුද්ගලයෙකුගෙන් රුපියල් 3,000ක මුදලක් අය කරගෙන තිබූ බවයි හෙළිව ඇත්තේ.
අත්අඩංගුවට පත් පුද්ගලයින් සන්තකයේ තිබී ගංජා, හෑෂ්, මදන මෝදක, මත්පෙති වැනි මත්ද්‍රව්‍ය සොයාගත් බව පොලිසිය වැඩිදුරටත් සඳහන් කළා.
මොවුන් අද (02) දිනයේ නාඋල අධිකරණය වෙත ඉරිදිපත් කිරීමට නියමිත බවයි වාර්තා වන්නේ.
