ඉකුත් මැයි 09 වනදා පංචිකාවත්ත ප්‍රදේශයේ දී පොලිස් අධිකාරි නාලක සේනානායක මහතාට පහරදී බරපතළ තුවාල සිදුකර ඔහු සතුව තිබූ පිස්තෝලය කොල්ලකෑ තරුණයෙකු මාලිගාවත්තේ දී අත්අඩංගුවට ගත් බව අපරාධ පරීක්ෂණ දෙපාර්තමේන්තුව මාධ්‍යයට පවසා සිටිනවා.
ඔහු විසින් කොල්ලකෑ පිස්තෝලය, පතොරම් ගැබ හා ජීව උණ්ඩ 10ක් ද මෙම සැකකරු සන්තකයේ තිබී සොයාගෙන ඇත.
එම සිදුවීම වූ දිනයේ දී පොලිස් අධිකාරී නාලක සේනානායක මහතා ගමන්ගත් නිල වාහනයට සහ තවත් නිල වාහනයකට පහරදී බරපතළ අලාභ සිදුකිරීමට සැකකරු ඇතුළු පිරිසක් ක්‍රියා කර තිබේ. මෙම මංකොල්ල කෑම සිදුවී තිබුනේද එම අවස්ථාවේ දීය.
මෙම සිදුවීමට අදාළ සැකකරු අත්අඩංගුවට ගැනුණේ අපරාධ පරීක්ෂණ දෙපාර්තමේන්තුව ඒ සම්බන්ධයෙන් සිදුකළ විමර්ශනවලදීය.අත්අඩංගුවට ගත් සැකකරු ව්‍යාපාරිකයකු වන අතර මාලිගාකන්ද අධිකරණය වෙත ඔහු ඉදිරිපත් කිරීමට නියමිතය.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව වැඩිදුර පරීක්ෂණ සිදුකරයි.
