පාකිස්ථාන ක්‍රිකට් කණ්ඩායමේ වේග පන්දු පුහුණුකරු ලෙස කටයුතු කිරීමට එරට හිටපු වේග පන්දු ක්‍රීඩක උමාර් ගුල් පත්වීමේ ඉඩකඩක් පවතින බවට වාර්තා වනවා.
විදෙස් මාධ්‍ය වාර්තා පෙන්වාදෙන පරිදි උමාර් ගුල් මීට සිය එකඟතාව ලබා දී ඇත්තේ, දකුණු අප්‍රිකානු හිටපු ක්‍රිකට් ක්‍රීඩකයෙකු මෙන් ම, පාකිස්ථාන කණ්ඩායමේ හිටපු වේග පන්දු පුහුණුකරු වන මෝර්න් මෝකල් (Morne Morkel) ඊයේ දිනයේ දී තම ධුරයෙන් ඉවත් වීම හේතුවෙන්.
මෝකල් ඊයේ දිනයේ දී සිය සේවා කාලය අවසන් කළේ මාස 06ක කාලයක කොන්ත්‍රාත් පදනමක් යටතේ පාකිස්ථාන කණ්ඩායම වෙනුවෙන් වේග පන්දු පුහුණුකරු ලෙස කටයුතු කිරීමේ කාලය අවසන් වූ බැවින්.
මෝර්ක්ල් මෙම වසරේ ජුනි මාසයේ දී යි පාකිස්ථාන ක්‍රිකට් කණ්ඩායම සමග එක් වූයේ.
මීට පෙර ද පාකිස්ථාන කණ්ඩායමේ පන්දු යැවීමේ පුහුණුකරුවෙකු ලෙස කටයුතු කර ඇති ගුල් නැවත වරක් එම තනතුරට පත් වනු ඇතැයි විශ්වාස කරන බවට ද ආරංචි මාර්ග වාර්තා වනවා.
තමාට මෙතෙක් පාකිස්ථානු ක්‍රිකට් කවුන්සිලය විසින් කතා කර නොමැති බවත්, එසේ වුවහොත් ඊට එකහෙලා ම එකඟ වීමට තමන් දැඩි අපේක්ෂාවෙන් සිටින බවයි උමාර් ගුල් පවසන්නේ.
41 හැවිරිදි උමාර් ගුල් එක්දින තරග 130කට ක්‍රීඩා කරමින් කඩුලු 179ක් බිඳ හෙලා තිබෙනවා.
ගුල් ගේ හොඳම පන්දු යැවීම ලෙස සටහන් වන්නේ ලකුණු 42කට කඩුලු 06ක්.
ටෙස්ට් තරග 47කට එක් ව කඩුලු 163ක් බිඳ හෙලා ඇති ගුල් ගේ හොඳම ටෙස්ට් කඩුලු සංඛ්‍යාව සටහන් ව ඇත්තේ ලකුණු 135කට කඩුලු 06ක් ලෙසයි.
ලබන මාසයේ දී පාකිස්ථාන කණ්ඩායම ඔස්ට්‍රේලියාවට එරෙහිව ටෙස්ට් තරගාවලියකට එක්වීමට නියමිත අතර, ඊට පෙරාතුවයි මෙම සංශෝධනයන් සිදුවෙමින් පවතින්නේ.
