එංගලන්තය සමඟ පැවැත්වෙන දෙවන ටෙස්ට් තරගයේ ශ්‍රී ලංකා පළමු ඉනිමේ ගැලවුම්කරුවා බවට මැදපෙළ පිතිකරු කමිඳු මෙන්ඩිස් පත් වුණා.
එහිදී හුදෙකලා ඉනිම ක්‍රීඩා කළ කමිඳු පන්දු 120කට මුහුණ දෙමින් ලකුණු 74ක් රැස් කළා.
ඔහුගේ මෙම ඉනිමට හයේ පහර 03ක් සහ හතරේ පහර 08ක් ඇතුළත් වුණා.
මේ අතර කමිඳුගේ ඉනිමේ දී ඔහු එල්ල කළ හයේ පහරක් ලෝඩ්ස් ප්‍රේක්ෂකාගාරයේ තරගය නරඹමින් සිටි ප්‍රේක්ෂකයෙකුගේ හිසේ වැදීමෙන් එම ප්‍රේක්ෂකයය අනතුරකට ලක්වූ ආකාරය දැකගත හැකි වුණා.
ලෝඩ්ස් ප්‍රේක්ෂකාගාරයේ සිට තරගය නරඹමින් සිටි MCC (මර්ලිබෝන් ක්‍රිකට් සමාජයේ) සාමාජිකකයෙකු පන්දුව වැදීමෙන් මෙලෙස අනතුරට ලක්ව ඇති අතර, එහිදී MCC සාමාජිකයා පන්දුව අල්ලා ගැනීමට උත්සාහ කළ නමුත් එය ඔහුගේ දෑතින් ගිලිහී ගොස් පන්දුව ඔහුගේ හිසට වැදී තිබෙනවා.
කෙසේ වෙතත් ඔහුගේ තත්ත්වය බරපතළ නොවූ බවයි පසුව වාර්තා වුණේ.
මේ අතර තරගයේ විවේකයෙන් පසු කමිඳු එම ප්‍රේක්ෂකයා මුණගැසී ඔහුගේ තත්ත්වය සම්බන්ධයෙන් විමසීමට ද කටයුතු කර තිබෙනවා.
ඔහු හොඳින් සිටින බව සහතික කිරීමත් සමඟ කමිඳු ඒ සම්බන්ධයෙන් සිය සතුට පළකර ඇති බවයි ලෝඩ්ස් ක්‍රීඩාංගණයෙන් වාර්තා වුණේ.
Well done kumudu. Hail Sri Lanka.