LPL ක්‍රිකට් තරගාවලියේ ආරම්භක උත්සවයේදී ජාතික ගීය විධිමත් නොවන ආකාරයෙන් ගායනා කිරීම හා වාදනය කිරීම සම්බන්ධයෙන් කඩිනම් විමර්ශනයක් සිදු කරන්නැයි රාජ්‍ය අමාත්‍ය අශෝක ප්‍රියන්ත මහතා පොලිස්පතිවරයාගෙන් ඉල්ලීමක් කර තිබෙනවා.
එල්.පී.එල් ආරම්භක උත්සවයේදී උමාරා සිංහවංශ ජාතික ගීය ගායනා කිරීමේදී හා එය වාදනය කිරීමේදී විධිමත් ආකාරයෙන් සිදු නොකිරීම සම්බන්ධයෙන් කඩිනම් විමර්ශනයක් සිදු කරන ලෙස ඉල්ලා රාජ්‍ය අමාත්‍ය අශෝක ප්‍රියන්ත පොලිස්පති සී.ඩී. වික්‍රමරත්න මහතාට ලිපියක් යොමු කරමිනුයි මෙම ඉල්ලීම් සිදු කර ඇත්තේ.
මේ අතර මෙම සිද්ධිය සම්බන්ධයෙන් විමර්ශනයක් සිදු කරමින් වාර්තාවක් තමාට ලබා දෙන ලෙස අමාත්‍ය දිනේෂ් ගුණවර්ධන ද රාජ්‍ය පරිපාලන හා ස්වදේශ කටයුතු ලේකම් රංජිත් අශෝක මහතාට දැනුම් දී තිබෙනවා.
ඒ අනුව එම අමාත්‍යාංශයේ අතිරේක ලේකම්වරයෙක් සහ අධ්‍යාපන අමාත්‍යාංශයේ සහකාර ලේකම්වරයෙකු අදාළ විමර්ශන සිදු කරනු ලබනවා.
එහිදී ආණ්ඩුක්‍රම ව්‍යවස්ථාව උල්ලංඝණය වීමක් සිදුකර තිබේදැයි යන්න සම්බන්ධයෙන් මූලිකව සොයා බලනු ඇති.
විමර්ශන වාර්තාව අමාත්‍යාංශ ලේකම්වරයාට භාරදී ඉන් අනතුරුව නීතිපති උපදෙස් ලබාගැනීමට තීරණය කර ඇති බවයි රාජ්‍ය පරිපාලන හා ස්වදේශ කටයුතු අමාත්‍යාංශය පවසන්නේ.
සිද්ධිය සම්බන්ධයෙන් ප්‍රකාශයක් ලබා ගැනීම සඳහා උමාරා සිංහවංශ රාජ්‍ය පරිපාලන හා ස්වදේශ කටයුතු අමාත්‍යංශයට පැමිණෙන ලෙසට දැනුම් දීමක් ද සිදු කර තිබුණා.
මේ සම්බන්ධයෙන් වාර්තාවක් ලබාදෙන ලෙසට අග්‍රාමාත්‍යවරයා රාජ්‍ය පරිපාලන හා ස්වදේශ කටයුතු අමාත්‍යංශ ලේකම්ට කළ දැනුම් දීම අනුවයි විමර්ශන ආරම්භ කර ඇත්තේ.
