ඊයේ (28) රාත්‍රියේ පැවති අධික වර්ෂාවත් සමඟ ඉන්දීය ප්‍රිමියර් ලීග් තරගාවලියේ අවසන් මහා තරගයට බාධා එල්ල වුණා.
ඒ, හේතුවෙන් එම තරගය අද දිනයේ දී පැවැත්වීමටයි සංවිධායකයින් තීරණය කළේ.
අහමදාබාද් නුවර නරේන්ද්‍ර මෝදි ක්‍රිකට් ක්‍රීඩාංගණයේ දී මෙම තරගය පැවැත්වෙන අතර, අද දිනයේ අහමදාබාද් හි කාලගුණය පිළිබඳව බොහෝ දෙනෙකුගේ අවදානය මේ වනවිට යොමුව තිබෙනවා.
කෙසේ වෙතත් අද (29) දිනයේ දී අහමදාබාද්හි නරේන්ද්‍ර මෝදි ක්‍රීඩාංගණයේදී පන්දුවාර 40ම ක්‍රීඩාකළ හැකි සම්පූර්ණ තරගයක් පැවැත්වීමට බොහෝ දුරට අවස්ථාව පවතින බවයි කාලගුණ අංශ සඳහන් කළේ.
ඒ, අනුව අහමදාබාද් රාත්‍රී අහස බොහෝ දුරට පැහැදිලි ලෙස පවතිනු ඇති බවයි එම අංශ වැඩිදුරටත් පවසන්නේ.
අද රාත්‍රියේ දී වර්ෂාපතනයට ඇති ඉඩකඩ 3%ක් පමණක් බවත් කාලගුණ අංශ දැනුම් දෙනවා.
දිවා කාලයේ වර්ෂාව ඇති වීමේ සුළු හැකියාවක් පැවතිය ද, තරගය පැවැත්වෙන වේලාවන්හි දී අහස බොහෝ දුරට පැහැදිලි ලෙස පවතින බවයි කාලගුණ බලධාරීන් වැඩිදුරටත් සඳහන් කළේ.
