අපරාධ පරීක්ෂණ දෙපාර්තමේන්තුවේ නිලධාරීන් ලෙස පෙනී සිටිමින් රුපියල් කෝටියක මුදලක් අල්ලස් ලෙස ලබාගත් සිව්දෙනෙක් අත්අඩංගුවට ගෙන තිබෙනවා.
කාන්තාවක් සහ පිරිමි පුද්ගලයින් තිදෙනෙක් මෙලෙස ඊයේ (29) පස්වරුවේ කොල්ලුපිටිය ප්‍රදේශයේ දී අත්අඩංගුවට ගත් බවයි අල්ලස් හෝ දූෂණ චෝදනා විමර්ශන කොමිෂන් සභාව සඳහන් කළේ.
දෙහිවල ප්‍රදේශයේ පදිංචි පුද්ගලයෙකු විසින් සිදුකළ පැමිණිල්ලකට අනුව මෙම අත්අඩංගුවට ගැනීම සිදුකර තිබෙනවා.
කොල්ලුපිටියේ පිහිටි නිවසක් පරීක්ෂාකර පැමිණිලිකරුට අයත් රුපියල් 12,000,000ක් හා ඩොලර් 3,500ක් අදාළ සැකකරුවන් විසින් රැගෙන ගොස් ඇති බවයි වාර්තා වුණේ.
එහිදී සැකකරුවන් විසින් එම නිවසේ සේවය කරමින් සිටි ඉන්දියානු ජාතිකයාගේ විදේශ ගමන් බලපත්‍රය රැගෙන ගොස් ඇති බව සඳහන්.
පසුව ඔවුන් විසින් පැමිණිකරුට දුරකථනයෙන් ඇමතුමක් ලබාදී ඔහුට විරුද්ධව විමර්ශනයට උදව් කිරීමට සහ රැගෙන යන ලද විදේශ ගමන් බලපත්‍රය නැවත ලබාදීමට රුපියල් කෝටි 04ක මුදලක් ඉල්ලා ඇති බවයි වාර්තා වන්නේ.
පසුව එම මුදල කෝටි 3 හමාරක් දක්වා අඩුකර ඇති අතර, එහි පළමු කොටස ලෙස රුපියල් කෝටියක මුදලක් අල්ලස් ලෙස ලබාගෙන තිබෙනවා,
ඒ, අනුව අල්ලස් ලෙස රුපියල් කෝටියක මුදලක් ලබාගැනීම සම්බන්ධයෙන් සැකකරුවන් තිදෙනෙක් සහ සැකකාරිය මෙලෙස අත්අඩංගුවට ගෙන ඇති බවයි වාර්තා වුණේ.
අත්අඩංගුවට ගැනුණු සැකකරුවන් අද (30) දින කොළඹ ප්‍රධාන මහෙස්ත්‍රාත් අධිකරණය හමුවට ඉදිරිපත් කිරීමට නියමිතව තිබෙනවා.
