එමිරාටි අඩු වියදම් ගුවන් සේවය වන එයාර් ඇරබියා ලබන වසරේ සිට එක්සත් අරාබි එමීර් රාජ්යය සහ ශ්රී ලංකාව අතර සතිපතා ගුවන් ගමන් තුනක් ක්රියාත්මක කරන බව නිවේදනය කර තිබෙනවා.
2024 වසරේ ජනවාරි 03 වනදා අබුඩාබි ජාත්යන්තර ගුවන්තොටුපළ සහ කටුනායක බණ්ඩාරනායක ජාත්යන්තර ගුවන්තොටුපළ අතර ගුවන් ගමන් ආරම්භ කරන බවයි ගුවන් සමාගම ප්රකාශ කළේ.
ශ්රී ලංකාවට පැමිණීම එයාර් ඇරබියා සමාගමේ 34 වන ගමනාන්තය සනිටුහන් කරනවා.
මෙම පියවර එයාර් ඇරබියා අබුඩාබි අගනුවරට සහ ඉන් පිටත සම්බන්ධතාව වැඩිදියුණු කිරීමේ අඛණ්ඩ වැඩසටහනේ කොටසක්.
එයාර් ඇරබියා හි සමූහ ප්රධාන විධායක නිලධාරී ඇඩෙල් අල් අලි ප්රකාශ කළේ අබුඩාබි සිට සෘජු ගුවන් ගමන් සමඟින් වර්ධනය වන ජාලයට කොළඹ එක් කිරීමට ලැබීම සම්බන්ධයෙන් සතුටු වන බවයි.
ලොව ප්රමුඛතම ගුවන් ගමන් මෙහෙයුම් මධ්යස්ථානයක් වන එක්සත් අරාබි එමීර් රාජ්යය සහ ශ්රී ලංකාව අතර ගුවන් ගමන් මෙහෙයුම් පිළිබඳව වසර 03 කට පමණ පසු සාකච්ඡාවක් පසුගියදා කොළඹ දී පවත්වා තිබුණා.
ඒ සඳහා ශ්රී ලංකාව නියෝජනය කරමින් වරාය, නාවික හා ගුවන් සේවා අමාත්යාංශයේ ලේකම් කේ.ඩී.එස්.
රුවන්චන්ද්ර, ශ්රී ලංකා සිවිල් ගුවන් සේවා අධිකාරියේ අධ්යක්ෂ ජනරාල් සහ ප්රධාන විධායක නිලධාරී පී.ඒ.ජයකාන්ත මහතා ඇතුළු පිරිසක් සහභාගී වී තිබෙනවා.
එක්සත් අරාබි එමීර් රාජ්යය වෙනුවෙන් එරට සිවිල් ගුවන් සේවා අධ්යක්ෂ ජනරාල් සයීෆ් අල් සුවයිදි, ශ්රී ලංකාවේ එක්සත් අරාබි එමීර් රාජ්යයේ තානාපති චාලීඩ් නසාර් අල් අමෙරි යන මහත්වරුන් ඇතුළු 23 දෙනෙකුගෙන් යුතු පිරිසක් සහභාගී වී සිටියා.
එහිදී ශ්රී ලංකාවේ ගුවන් සේවා වන ශ්රී ලන්කන් සහ ෆිට්ස් එයාර් ගුවන් සේවා වෙනුවෙන් නියෝජිතයන් සහ එක්සත් අරාබි එමීර් රාජ්යයේ ගුවන් සේවා වන එමිරේට්ස්, ඉටිහාඩ්, ෆ්ලයි ඩුබායි සහ එයාර් ඇරේබියා ගුවන් සේවා නියෝජනය කරමින් නියෝජිතයන් ද සහභාගී වී සිටි බව සඳහන්.
ඔවුන් දෙරට අතර ගුවන් ගමන් සේවා යාවත්කාළීන කිරීමටත්, ලෝකයේ නව ප්රවනතා අනුව ගුවන් ගමන් මෙහෙයුම් සකස් කිරීම සහ වර්ධනය කිරීම පිළිබඳවත් සාකච්ඡා කර තිබෙනවා.
මෙම සාකච්ඡා වලින් අනතුරුව දෙරට අතර අවබෝධතා ගිවිසුමක් ද අත්සන් කර තිබෙනවා.
