බොලිවුඩ් තිරයේ අතිශය ජනප්‍රිය රංගන ශිල්පීන් දෙදෙනෙකු වන රන්බීර් කපූර් සහ ආලියා බාත් අතර විවාහ මංගලෝත්සවය මුම්බායිහි සුඛෝපභෝගි කපූර් මන්දිරයේදී අද සන්ධ්‍යාවේ පැවැත්වෙනවා.
39 හැවිරිදි රන්බීර් කපූර්ගේ මව නීතු සිං ද සුප්‍රකට බොලිවුඩ් නිළියක වන අතර, ඔහුගේ ඥාති සොහොයුරින් වන කරීනා කපූර් සහ කරීෂ්මා කපූර් ඇතුළු පවුලේ සමීපතමයන්ට පමණක් විවාහ මංගල උත්සවය සීමා වීම විශේෂත්වයක්.
ෆිල්ම් ෆෙයාර් සම්මාන රැසක් ජයග්‍රහණය කර ඇති ආලියා බාත්, චිත්‍රපට අධ්‍යක්ෂ මහේෂ් බාත් සහ සිනමා නිලි සෝනි රස්ඩාන්ගේ දියණිය වන අතර, බොලිවුඩ් පුරයේ වැඩිම ගෙවීමක් ලබන නිලියක ලෙස ෆෝබ්ස් ධනවතුන්ගේ ලැයිස්තුවට ද ඇතුළත්.
සමාජ මාධ්‍ය වෙබ් පිටුවල මිලියන සංඛ්‍යාත අනුගාමිකයන් සිටින රන්බීර් – ආලියා යුවලගේ විවාහ මංගල්‍යය පිලිබඳව ලොව පුරා විශාල අවධානයක් යොමුව තිබෙනවා.
රන්බීර් – ආලියා එක්ව රඟපාන ප්‍රථම චිත්‍රපටය බ්‍රහ්මස්ත්‍රා මේ වසර අවසානයේ සිනමා තිරයට පැමිණීමට නියමිතයි.
එහි ඔවුන් සමග රඟන බොලිවුඩ් සුපිරි රංගන ශිල්පී අමිතාබ් බච්චන්, නව යුවලට ආදරය වාසනාව සහ ආලෝකය ප්‍රාර්ථනා කර ඇති බවයි බොලිවුඩ් පුරවරයෙන් ලැබෙන වාර්තා සඳහන් කර සිටින්නේ..
