කාලගුණයෙන් අනතුරු ඇඟවීමක්

නිරිත දිග බෙංගාල බොක්ක මුහුදු ප්‍රදේශයේ පවතින පීඩන අවපාතය පිළිබඳව කාලගුණ විද්‍යා දෙපාර්තමේන්තුවෙන් රතු නිවේදනයක් නිකුත් කර තිබේ.

ඒ ශ්‍රී ලංකාවට උතුරු සහ නැගෙනහිර වෙරළට ඔබ්බෙන් වන නොගැඹුරු සහ ගැඹුරු මුහුදු ප්‍රදේශ සඳහාය.

නිරිත දිග බෙංගාල බොක්ක සහ ඊට යාබඳ ගිනිකොණ දිග බෙංගාල බොක්ක ආශ්‍රිතව පැවති අඩුපීඩන කලාපය පීඩන අවපාතයක් දක්වා වර්ධනය වෙමින් පවතී. 

එම පීඩන අවපාතය ඉදිරි පැය 24ක කාලය තුළ තවදුරටත් ගැඹුරු පීඩන අවපාතයක් දක්වා වර්ධනය වියහැකි බව එම දෙපාර්තමේන්තුව පවසයි.

ඒ අනුව එය ශ්‍රී ලංකාවට නැගෙනහිර වෙරළ ආසන්නයෙන් ඉදිරි පැය 48ක කාලය තුළ ඉන්දියාවේ උතුරු තමිල්නාඩු වෙරළ දෙසට ගමන් කරනු ඇතැයි ද අපේක්ෂා කෙරේ.

මෙම පද්ධතියේ බලපෑම හේතුවෙන් ඉදිරි පැය 48 තුළදී දිවයිනේ උතුරු, ඊසාන, නැගෙනහිර සහ ගිනිකොණ දෙසින් වන ගැඹුරු සහ නොගැඹුරු මුහුදු ප්‍රදේශවල නිරන්තර වැසි හෝ ගිගුරුම් සහිත වැසි ඇති වියහැකි බවද කාලගුණ විද්‍යා දෙපාර්තමේන්තුව පෙන්වා දෙයි.

සුළඟේ වේගය පැයට කිලෝමීටර් 60ත් 70ත් දක්වා ඉහළ යා හැකිය.

මේ හේතුවෙන් නැවත දැනුම්දෙන තුරු මන්නාරම සිට කන්කසන්තුරය, ත්‍රිකුණාමලය සහ මඩකලපුව හරහා හම්බන්තොට දක්වා වෙරළට ඔබ්බෙන් වන ගැඹුරු සහ නොගැඹුරු මුහුද ප්‍රදේශවල ධීවර සහ නාවික කටයුතුවල නොයෙදෙන ලෙස කාලගුණ විද්‍යා දෙපාර්තමේන්තුව අවවාද කරයි.

දැනට එම මුහුදු ප්‍රදේශවල ධීවර කටයුතුවල යෙදී සිටින පිරිස වහාම ගොඩබිමට හෝ ආරක්ෂිත ස්ථානයක් වෙත පැමිණිය යුතු බවද දන්වයි.

මේ සම්බන්ධයෙන් කාලගුණ විද්‍යා දෙපාර්තමේන්තුව  ඉදිරියටත් නිකුත් කරන නිවේදන ගැන අවධානයෙන් පසුවන ලෙසද දැනුම් දෙයි.