ශ්රී ලංකා අක්ෂිදාන සංගමයට ඉකුත් වසරේ දන් දුන් ඇස්වලින් විදෙස්ගත පුද්ගලයන් 3355කට පෙනීම ලබාදී ඇතැයි එම සංගමයේ ජ්යෙෂ්ඨ කළමනාකරු ජනත් සමන් මාතරආරච්චි පවසයි.
ඉකුත් වසරේදී (2021) අක්ෂිදාන සංගමයට පුද්ගලයන් 4540ක් ඇස් දන්දී තිබේ. එම ඇස්වලින් මෙරට පුද්ගලයන් 1185ක්ද පෙනීම ලබාදී ඇති බව අනාවරණය වේ.
අක්ෂිදාන සංගමය සඳහන් කරන පරිදි පසුගිය වසර හැටක කාලය පුරාවට ශ්රී ලාංකිකයන් දන් දුන් ඇස්වලින් විදේශීය පුද්ගලයන් අසූ තුන්දහස් නමසිය අනූහතර දෙනකු (83,994) පෙනීම ලබා ඇති බවද ජ්යෙෂ්ඨ කළමනාකරු කියයි. එම කාලය තුළදී පෙනීම ලබා ඇති මෙරට පුද්ගලයන් ගණන පනස් හය දහස් එකසිය අනූ නමයකි. (56,199)
1961 වසරේදී ආරම්භ කරන ලද ශ්රී ලංකා අක්ෂිදාන සංගමයට ඉකුත් වසර (2021) දක්වා වූ කාලය තුළදී මෙරට පුද්ගලයන් එක් ලක්ෂ අසූ තුන්දහස් හත්සිය තිස් එකක් (183,731) ඇස් දන්දී ඇති අතර ඇස් දන් දීමට කැමැත්ත පළ කර තිබෙන පරිත්යාගශීලීන් සංඛ්යාව මිලියන දෙකකි.
මෙලෙස පරිත්යාග කරන ඇසක් සංරක්ෂණය කිරීම සඳහා වැය කෙරෙන මුදල රුපියල් විසිපන් දහසකි.
