දිවයින පුරා මේ වනවිට හටගෙන ඇති විදුලි අර්බුදයට තාවකාලික විසඳුමක් ලෙස විදුලිය පරිභෝජනය අරපිරිමැස්මෙන් සිදු කරන ලෙස විදුලිබල මණ්ඩලයේ තාක්ෂණික ඉංජිනේරු අධිකාරිවරුන්ගේ සංගමයේ ලේකම් නලින් හේවාපටබැඳිගේ ඉල්ලීමක් සිදු කරනවා.
විදුලි ජනන යන්ත්‍ර ඇති පිරිස් ඒවා භාවිත කර විදුලිය ලබා ගැනීමට පෙළෙඹෙන ලෙස පවසන ලේකම්වරයා කියා සිටින්නේ, විදුලිය අධික ලෙස පරිභෝජනය කරන අවස්ථාවේ දී ඒවා සැලකිලිමත් ලෙස භාවිත කරන ලෙසයි.
ලංකා විදුලිබල මණ්ඩලය පැය 24 පුරාම ජනතාවට විදුලිය සැපයීමට බැඳී ඇති අතර, එහෙත් රටේ පැන නැග ඇති මෙම අර්බුදකාරී වාතාවරණය තුළ කඩිනමින් ඊට විසඳුම් ලබාගත නොහැකි බවයි ඔහු පැවසුවේ.
දීර්ඝ කාලයක් පොසිල ඉන්ධන මත යැපීමට හැකියාවක් නොමැති අතර, එබැවින් නියත වශයෙන් ම පුනර්ජනනීය බලශක්ති වෙත ගමන් කළ යුතු බවයි ලංවිම ලේකම්වරයා කියා සිටින්නේ.
විදුලි බිඳවැටීම් රටපුරා අවස්ථා දෙකක් මෑතකදී වාර්තා වූ බවත්, ඒ පිළිබඳ නිසි විමර්ශනයක් සිදු කර වාර්තාවක් ජනතාව වෙත ඉදිරිපත් කළ යුතු බවත් සඳහන් කළැ ලේකම්වරයා වැඩිදුරටත් කියා සිටියේ එම කටයුතු සඳහා මේ වනවිට කමිටුවක් පත් කර ඇති බවයි.
මීට පෙර ද මෙවැනි අක්‍රමිකතා සිදුව ඇති අතර, ඒවා ගැන විමර්ශනය කිරීමට පත් කළ වාර්තා නිසි අයුරින් සමාජගත නොවීම ද මෙවැනි ක්‍රියා යළි යළි ඇතිවීමට හේතුවක් වන බව පෙන්වා දෙන ලේකම්වරයා පැවසුවේ, වාර්තාවේ නිර්දේශ ක්‍රියාත්මක කරනවා දැයි මහජනතාව විසින් මහජන උපයෝගීතා කොමිසම දෙස වෘත්තීය සමිති සමග එක්ව මහත් අවධානයෙන් බලා සිටින බවයි.
