ශ්‍රී ලංකාවේ පළමු ටෙස්ට් ක්‍රිකට් නායක බන්දුල වර්ණපුරගේ අවසන් කටයුතු අද (19) පස්වරු 4.30ට බොරැල්ල කනත්තේ දී සිදුකිරීමට නියමිතය.
කලක් රෝගාතුරව සිටි බන්දුල වර්ණපුර පසුගිය සතියේ පාදයේ සැත්කමකට ද මුහුණදුන් අතර මියයන විට 68 වැනි වියේ පසුවුණි.
ශ්‍රී ලංකාව වෙනුවෙන් පළමු පන්දුවට පහරදීමේ හා පළමු ලකුණ රැස්කිරීමේ ගෞරවය හිමිවන්නේ මෙරට පළමු ටෙස්ට් නායක බන්දුල වර්ණපුර අද සිය ජීවිත ඉනිම සඳහට ම අවසන් කළේය.
කොළඹ නාලන්දා විද්‍යාලයේ ආදි සිසුවකු වන බන්දුල වර්ණපුර ශ්‍රී ලංකා ජාතික ක්‍රිකට් පිලට එක් වූයේ ආරම්භක පිතිකරුවකු ලෙසය.
ඔහු 1975 පළමු ලෝක කුසලාන තරඟාවලියේ දී ජාත්‍යන්තර එක්දින වරම් ලැබූ ශ්‍රී ලංකා කණ්ඩායමේ සාමාජිකයකුද වුණි.
බන්දුල 1979 ශ්‍රී ලංකාව ලැබූ පළමු එක්දින තරඟ ජයග්‍රහණයේ ද කොටස්කරුවෙකි.
පසුව ශ්‍රී ලංකා පිලේ නායකත්වයට පත් වූ බන්දුල වර්ණපුර 1982 පැවති මෙරට පළමු ජාත්‍යන්තර ටෙස්ට් තරඟයේ නායකත්වය දැරූ අතර ශ්‍රී ලංකාව වෙනුවෙන් ටෙස්ට් තරඟයක පළමු පන්දුවට පහර දීමේ ගෞරවය හා පළමු ලකුණ රැස්කිරීමේ ගෞරවයටද හිමිකම් කියයි.
කෙසේ වෙතත් ඔහුගේ ජාත්‍යන්තර ටෙස්ට් ක්‍රිකට් දිවිය අනපේක්ෂිත අයුරින් අතරමඟ නතරකිරීමට සිදුවුණි.
ඒ 1983 දී එවක වර්ණභේදවාදය නිසා තහනම්ව පැවති දකුණු අප්‍රිකාවේ ක්‍රිකට් සංචාරයක නිරතවීම හේතුවෙනි.
එම වරදට ශ්‍රී ලංකා ක්‍රිකට් ආයතනය විසින් බන්දුල වර්ණපුර ඇතුළු චෝදනා ලැබූ ක්‍රීඩකයන්ට වසර 25ක සියලු ආකාරයේ ක්‍රිකට් තරඟ තහනමක් පනවනු ලැබීය.
ඒ වනවිට ඔහු ක්‍රීඩාකර තිබුණේ ටෙස්ට් තරඟ 4කට සහ එක්දින තරඟ 12කට පමණි.
එහෙත් වසර 07 කට පසු එම තහනම ඉවත් කෙරුණු අතර ඒ අනුව බන්දුලට ක්‍රිකට් කටයුතු සඳහා සක්‍රීයව දායකවීමට අවස්ථාව උදාවුණි.
ක්‍රීඩකයකු ලෙස මෙහෙය නිමා වුණත් පසුව ඔහු පුහුණුකරුවකු, පරිපාලකයකු මෙන්ම ජාත්‍යන්තර ක්‍රිකට් සම්මේලනයට අනියුක්ත නිලධාරියකු ලෙස ජාත්‍යන්තර ක්‍රිකට් ක්‍රීඩාවට පුළුල් සේවාවක් ඉටුකළේය.
බන්දුල වර්ණපුර පසුකාලීනව මෙරට ජනතාවගේ වඩාත් හඳ බැඳගත්තේ ක්‍රිකට් විස්තර විචාරකයකු ලෙස ඉටුකළ සුවිශේෂී කාර්යභාරය නිසාවෙනි.
