පවතින වසංගත තත්වය හමුවේ ප්රථමයෙන්ම සාමාන්ය පෙළ සහ උසස් පෙළ සිසුන්ට කොවිඩ් මර්ධන එන්නත ලබා දෙන බව වාර්තා වනවා. මෙය සෞඛ්ය අමාත්යංශයේ නිර්දේශ මත එය සිදු කරන බවත් කෙසේවෙතත් ඒ පිළිබඳව තවමත් නිශ්චිත දිනයක් පැවසීමට නොහැකි බවත් අධ්යාපන අමාත්යංශයේ ආරංචි මාර්ග පවසනවා.
එමෙන්ම, 2021 වසර සඳහා උසස් පෙළ සහ 5 ශ්රේණියේ ශිෂ්යත්ව විභාග සඳහා තවමත් අයදුම් නොකළ සිසුන් සඳහා අයදුම් කිරීමේ දිනය දීර්ඝ කර ඇති බව විභාග දෙපාර්තමේන්තුව නිවේදනය කරයි. අයදුම් කිරීමේ කාලය සැප්තැම්බර් 15 දක්වා දීර්ඝ කර ඇති බව විභාග කොමසාරිස් ජනරාල්වරයා නිවේදනය කරයි.
මේ අතර,ගුරු – විදුහල්පති වැටුප් විෂමතා ගැටලුව සම්බන්ධයෙන් කැබිනට් මණ්ඩලයේ තීරණය අද (30) ලබාදීමට නියමිතව තිබේ. අමාත්ය අනුකමිටු යෝජනාව පසුගිය සතියේ කැබිනට් මණ්ඩලය වෙත යොමුකෙරුණි.
අමාත්ය අනුකමිටුව ඉදිරිපත්කළ යෝජනා සම්බන්ධයෙන් වෘත්තීය සමිතිවල එකඟතාවද පළ වී ඇති බව වාර්තා වේ. වෘත්තීය සමිති සහ අධ්යාපන අමාත්යවරයා අතර පසුගිය දා පැවැති සාකච්ඡවේ දී සාධනීය තත්ත්වයක් ඇති වු බව ගුරු වෘත්තීය සමිති ප්රකාශ කළේය.
විසඳුම් ඉදිරිපත් වු වහාම ඔන්ලයින් අධ්යාපනයෙන් බැහැරව සිටිම, සාමාන්ය පෙළ ප්රායෝගික පරික්ෂණවලින් ඉවත්ව සිටිම ඇතුළු වෘත්තීය ක්රියාමාර්ගවලින් බැහැර වන බව ඔවුන් සඳහන් කළේය.
මේ අතර ගුරු – විදුහල්පති වෘත්තීය සංගම් විසින් සංවිධානය කළ විරෝධතාවලට සහභාගි වු ගුරුවරුවන්ගෙන් කිහිපදෙනෙකු කොවිඩ් ආසාදිතව මියගොස් ඇති බවට සිදුකෙරෙන ප්රකාශ අසත්ය බව ලංකා ගුරුසේවා සංගමයේ ප්රධාන ලේකම් මහින්ද ජයසිංහ මහතා පැවසීය.