කාවන්තිස්ස නමින් ප්‍රකට හස්තියාගේ මරණය සම්බන්ධයෙන් අත්අඩංගුවට ගෙන රක්ෂිත බන්ධනාගාරගත කර සිටින ශාන්ත ධර්මසිරි සහ ලක්මාල් පද්මකුමාර යන සැකකරුවන් දෙදෙනාට ඇප ලබාදීම ප්‍රතික්ෂේප කළ අධිකරණය, ඔවුන් ලබන නොවැම්බර් 11 වැනිදා දක්වා යළි රක්ෂිත බන්ධනාගාරගත කිරීමට ඊයේ (28) නියෝග කළේය.
ඇතාගේ මරණය සම්බන්ධයෙන් සිදුකෙරෙන විමර්ශනවලදී රස පරීක්ෂක වාර්තා කැඳවීමේ අවශ්‍යතාව සහ ප්‍රතිකාර කටයුතුවලදී යම් හානියක් සිදුවී ඇත්දැයි විමර්ශනය කිරීමේ වැදගත්කම ද මෙහිදී අවධාරණය කෙරුණා.
මෙම නඩුව පළමු වරට පසුගිය ඔක්තෝබර් 19 වැනිදා කැඳවීමෙන් අනතුරුව, දෙවන නඩු වාරය ඊයේ (28) පැවැත්වුණා.
එදින සිට රක්ෂිත බන්ධනාගාරගත කර සිටි සැකකරුවන් දෙදෙනා ඊයේ යළි අධිකරණයට ඉදිරිපත් කෙරුණා.
පැමිණිල්ල වෙනුවෙන් වැටලීමට සම්බන්ධ වූ කුරුණෑගල වනජීවී අඩවි ආරක්ෂක චතුර ගුණරත්න ඇතුළු වනජීවී නිලධාරීහු අධිකරණයට පැමිණ සිටියා.
ඇතාගේ අයිතිවාසිකම් වෙනුවෙන් ප්‍රොටෙක්ටඩ් වර්ල්ඩ් සංවිධානය නියෝජනය කරමින් නීතිඥ විජිත වික්‍රමනායක ද, සුරකිමු අලි ඇතුන් සංවිධානය වෙනුවෙන් නීතිඥ රවීන්ද්‍ර ඉරුගල් බණ්ඩාර ද ඇතුළු නීතිඥවරුන් පිරිසක් පැමිණිල්ල වෙනුවෙන් කරුණු දැක්වූවා.
විත්තිය වෙනුවෙන් නීතිඥ උදය රාජපක්ෂ පෙනී සිටියා.
පළමු නඩු වාරයට සහභාගී නොවූ චතුර ගුණරත්න අද වැටලීම සිදුකළ ආකාරය සහ ඒ සඳහා පදනම් වූ තොරතුරු පිළිබඳව දීර්ඝ පැහැදිලි කිරීමක් සිදු කළා.
ඔහු අධිකරණයට ඉදිරිපත් කළ කරුණු අනුව, සැකකරුවන්ගේ ගම් ප්‍රදේශය වන හුනුගල්ලෑව ආශ්‍රිතව තොරතුරු රැස්කිරීමෙන් අනතුරුව මෙම වැටලීම සැලසුම් කර තිබෙනවා.
තොරතුරු ලබාගැනීම සඳහා නාට්‍ය කණ්ඩායමක සාමාජිකයන් ලෙස පෙනී සිටිමින් ප්‍රදේශයට ගොස් තොරතුරු රැස්කළ බව ද ඔහු සඳහන් කළා.
ප්‍රදේශයේ වෙළෙඳසැලක හිමිකරුවකුගෙන් ලද තොරතුරු අනුව කාවන්තිස්ස ඇතාට වෙඩි තැබීම සම්බන්ධයෙන් සැකයක් මතුවූ බවත්, එම තොරතුරු ඔස්සේ ලක්මාල් පද්ම කුමාර නමැත්තා පිළිබඳව ද විමර්ශන සිදුකළ බවත් පැමිණිල්ලේ කරුණු දැක්වීමේදී අනාවරණය වුණා.
ලක්මාල් පද්මකුමාරගේ නිවසේ දඩමස් තිබෙන බවට තොරතුරු ලැබීමෙන් පසු එම නිවසට ගිය බව චතුර ගුණරත්න අධිකරණයට දැනුම් දුන්නා.
එම අවස්ථාවේ නිවසේ සිට ඇත්තේ සැකකරුගේ බිරිඳ සහ ඇයගේ පියා බවත්, සැකකරු එහි නොසිටි බවත් පැමිණිල්ලේ කරුණු අතර සඳහන් වුණා.
එහිදී සැකකරුගේ බිරිඳ විසින් කළ බව කියන ප්‍රකාශයක් සහ ඔහු සතුව බලපත්‍ර සහිත ගිනිඅවියක් තිබෙන බවට ලැබුණු තොරතුරු පිළිබඳව ද කරුණු ඉදිරිපත් කෙරුණා.
එම ගිනිඅවිය සඳහා බලපත්‍රය ලබාගෙන තිබූ ප්‍රදේශය සහ එය භාවිත කළ බව කියන ප්‍රදේශය අතර වෙනසක් පැවති බවට ද පැමිණිල්ලෙන් කරුණු දැක්වුණා.
වැටලීමේදී පතුරම් තුනක් සහ කිලෝග්‍රෑම් තුනක පමණ දඩමස් සොයාගත් බව ද සඳහන් වුණා.
චතුර ගුණරත්නගේ කරුණු දැක්වීම අනුව, ලක්මාල් පද්මකුමාර විසින් තමන් වෙඩි නොතැබූ බවත්, ශාන්ත ධර්මසිරි වෙඩි තැබූ බවත් ප්‍රකාශ කර බවයි.
කෙසේ වෙතත්, මෙම කරුණු සහ චෝදනා තවදුරටත් විමර්ශනයට ලක්විය යුතු ඒවා වන අතර, සැකකරුවන්ගේ වරද අධිකරණයෙන් තහවුරු කර නැහැ.
මෙම සැකකරුවන් දෙදෙනාට අමතරව තවත් පුද්ගලයන් පස්දෙනකු අත්අඩංගුවට ගෙන තිබූ බව ද පැමිණිල්ලේ කරුණු අතර සඳහන්.
වැටලීමට අදාළ තොරතුරු ඉදිරිපත් කරන අතරතුර, නඩුවට සෘජුව අදාළ කරුණු පමණක් ඉදිරිපත් කරන ලෙස මහේස්ත්‍රාත්වරිය පැමිණිල්ලට දැනුම් දුන්නා.
ගිනිඅවි, ජීව උණ්ඩ සහ පතුරම් කොපු සම්බන්ධ රස පරීක්ෂක වාර්තා මෙන්ම ඇතාගේ මරණය පිළිබඳ පශ්චාත් මරණ පරීක්ෂණයට අදාළ කරුණු ද තවදුරටත් විමර්ශනය කළ යුතු බව පැමිණිල්ල පෙන්වා දුන්නා.
තවද, සැකකරුවන්ගෙන් කවරකු විසින් වෙඩි තැබීම සිදුකළේ ද යන්න සම්බන්ධයෙන් විමර්ශන තවදුරටත් ක්‍රියාත්මක වන බවත්, ඒ සම්බන්ධයෙන් ඇසින් දුටු සාක්ෂිකරුවකු පිළිබඳ තොරතුරු ලැබී ඇති බවත් චතුර ගුණරත්න අධිකරණයට ප්‍රකාශ කළා.
ඒ අනුව සැකකරුවන්ට ඇප ලබාදීමට පැමිණිල්ල විරෝධය පළ කළා.
ඇතාගේ අයිතිවාසිකම් වෙනුවෙන් පෙනී සිටි නීතිඥ විජිත වික්‍රමනායක අධිකරණයට කරුණු දක්වමින්, මෙම විමර්ශනයේ ප්‍රගතිය සම්බන්ධයෙන් ගැටලු පවතින බව පෙන්වා දුන්නා.
සංවිධානයට ලැබුණු තොරතුරු සහ නිරීක්ෂණ අනුව, මෙම සිද්ධිය එක් පුද්ගලයකු හෝ දෙදෙනකුගේ ක්‍රියාකලාපයකට පමණක් සීමා නොවිය හැකි බව ඔහුගේ කරුණු දැක්වීමේදී සඳහන්.
කාවන්තිස්ස ඇතාට වෙඩි වැදී තිබීම සහ පසුව ලබාදුන් වෛද්‍ය ප්‍රතිකාර සම්බන්ධයෙන් ද පුළුල් විමර්ශනයක් අවශ්‍ය බව නීතිඥවරයා පෙන්වා දුන්නා.
ඇතාගේ මරණයට හේතු වූයේ එක් සිදුවීමක් පමණක් නොව, විවිධ කරුණු එකතුවක ප්‍රතිඵලයක් විය හැකි බවට තම සංවිධානයේ නිරීක්ෂණ අනුව සැක මතුවන බව ද ඔහු සඳහන් කළා.
වනසත්ව හා වෘක්ෂලතා ආරක්ෂක ආඥාපනත සහ පොදු දේපළ සම්බන්ධ නීතිමය කරුණු පිළිබඳව ද අවධානය යොමු කළ ඔහු, ඇතාට සිදු වූ හානිය සම්බන්ධයෙන් නීතිය දැඩිව ක්‍රියාත්මක කිරීමේ අවශ්‍යතාව අවධාරණය කළා.
මෙවැනි වටිනා වනජීවී සම්පත් විනාශ වීම ශ්‍රී ලංකාවේ වනජීවී සංරක්ෂණයට පමණක් නොව, මෙරටට පැමිණෙන විදේශීය සංචාරකයන්ගේ ආකර්ෂණයට ද බලපෑ හැකි බව ඔහුගේ කරුණු දැක්වීමේදී පෙන්වා දුන්නා.
එබැවින් මෙම සිද්ධිය සම්බන්ධයෙන් පුළුල් හා කඩිනම් විමර්ශනයක් සිදුකිරීමේ අවශ්‍යතාව ඔහු අවධාරණය කළා.
සුරැකීමේ අයිතිය සංවිධානය වෙනුවෙන් පෙනී සිටි නීතිඥ රවීන්ද්‍ර ඉරුගල් බණ්ඩාර ද අධිකරණය හමුවේ කරුණු දැක්වූවා.
ඇතාගේ දකුණු පසට සිදු වූ බව කියන වෙඩි වැදීම සම්බන්ධයෙන් තමන්ට ලැබී ඇති තොරතුරු අනුව එය ඇතාගේ මරණයට හේතුවක් වන්නට ඇති බවට විශ්වාස කරන බව ඔහු සඳහන් කළා.
තම සංවිධානය විසින් සිදුකළ තොරතුරු සොයාබැලීම්වලදී සැකකරුවන් දෙදෙනා මෙම සිද්ධියට සම්බන්ධ බවට තොරතුරු ලැබී ඇති බවත්, ඒ සම්බන්ධයෙන් සාක්ෂිකරුවන් පිළිබඳ තොරතුරු ද ලැබී ඇති බවත් නීතිඥවරයා ප්‍රකාශ කළා.
විමර්ශන තවදුරටත් ක්‍රියාත්මක වන බැවින් සැකකරුවන්ට ඇප ලබාදුනහොත් සාක්ෂිකරුවන්ට බලපෑම් සිදුවීමේ අවදානමක් පැවතිය හැකි බව පෙන්වා දුන් ඔහු, ඇප ලබාදීමට විරෝධය පළ කළා.
“කටකතා මත පමණක් පුද්ගලයන් අත්අඩංගුවට ගත නොහැකියි” – විත්තියේ තර්කය සැකකරුවන් වෙනුවෙන් පෙනී සිටි නීතිඥ උදය රාජපක්ෂ මහතා පැමිණිල්ලේ කරුණු දැක්වීම්වලට විරෝධය පළ කරමින්, තම සේවාදායකයන්ට එරෙහිව ඉදිරිපත් කර ඇති සාක්ෂිවල ප්‍රමාණවත්භාවය පිළිබඳව ප්‍රශ්න කළා.
ගම් ප්‍රදේශයේ පැතිර ගිය කටකතා සහ තොරතුරු මත පදනම්ව සැකකරුවන් අත්අඩංගුවට ගෙන ඇති බවට ඔහු තර්ක කළා.
එවැනි තොරතුරු පමණක් පදනම් කරගෙන පුද්ගලයන්ට එරෙහිව ක්‍රියා කිරීමේ නීත්‍යනුකූලභාවය පිළිබඳව ද ඔහු ප්‍රශ්න කළා.
එසේම, තම සේවාදායකයන්ට එරෙහිව සාක්ෂි ලබාදීමට පුද්ගලයන්ට බලපෑම් සිදුකර ඇති බවට ද විත්තිය වෙනුවෙන් කරුණු ඉදිරිපත් කෙරුණා.
මෙම විමර්ශනය වනජීවී දෙපාර්තමේන්තුවෙන් සහ වලාන දූෂණ මර්දන ඒකකයෙන් ඉවත් කර ස්වාධීන ආයතනයක් වෙත පැවරීමේ අවශ්‍යතාව ද නීතිඥවරයා පෙන්වා දුන්නා.
ඇතාගේ මරණය සම්බන්ධයෙන් සමාජයේ ඇති වූ දැඩි අවධානය හමුවේ සැබෑ වගකිවයුත්තන් හඳුනාගැනීම වෙනුවට සැකකරුවන් දෙදෙනකු අත්අඩංගුවට ගැනීමෙන් පමණක් ප්‍රශ්නය විසඳීමට උත්සාහ කරන්නේද යන සැකය ද ඔහු මතු කළා.
එසේම, වනජීවී දෙපාර්තමේන්තුවේ නිල වෙබ් අඩවියේ මීට පෙර පළවූ තොරතුරුවල ඇතාට බඳින තුවක්කුවකින් වෙඩි වැදී ඇති බව සඳහන් වූ බවත්, පසුව විවිධ පුද්ගලයන් වෙඩි තැබීම සම්බන්ධයෙන් සැකකරුවන් ලෙස නම් කිරීම පිළිබඳව පැහැදිලි කිරීමක් අවශ්‍ය බවත් විත්තිය පෙන්වා දුන්නා.
අද වනතුරු තම සේවාදායකයන් ඇතාට වෙඩි තැබූ බව තහවුරු කරන සාක්ෂියක් ඉදිරිපත් කර නොමැති බව ද නීතිඥ උදය රාජපක්ෂ තර්ක කළා.
දෙපාර්ශ්වය විසින් ඉදිරිපත් කළ කරුණු සලකා බැලූ මහේස්ත්‍රාත්වරිය, කාවන්තිස්ස ඇතාගේ මරණය සම්බන්ධයෙන් විද්‍යාත්මක හා වෛද්‍ය සාක්ෂි ලබාගැනීමේ වැදගත්කම අවධාරණය කළාය. ඒ අනුව අදාළ ගිනිඅවි, උණ්ඩ සහ අනෙකුත් ද්‍රව්‍ය සම්බන්ධ රස පරීක්ෂක වාර්තා කැඳවීමට නියෝග කෙරුණා.
එසේම, ඇතාට ප්‍රතිකාර කළ වෛද්‍ය කණ්ඩායම විසින් සිදුකළ ප්‍රතිකාරවලදී සත්වයාට යම් හානියක් සිදුවී ඇත්ද යන්න පිළිබඳව විශේෂඥයන් මගින් පරීක්ෂා කර වාර්තාවක් ඉදිරිපත් කරන ලෙස ද නියෝග කර තිබෙනවා.
විමර්ශනවලට අදාළ වාර්තා කඩිනමින් ඉදිරිපත් කළ යුතු බව අවධාරණය කළ මහේස්ත්‍රාත්වරිය, ඒවා ඉදිරිපත් කිරීම අනවශ්‍ය ලෙස ප්‍රමාද නොකළ යුතු බව ද පෙන්වා දුන්නා.
සාක්ෂි නොමැතිව රක්ෂිත බන්ධනාගාරගත කිරීම දිගින් දිගටම දීර්ඝ කිරීම නොකළ යුතු බවට ද ඇය අවධානය යොමු කළා.
කෙසේ වෙතත්, විමර්ශනවල පවතින තත්ත්වය සහ සාක්ෂිකරුවන්ට බලපෑම් සිදුවිය හැකි බවට ඉදිරිපත් වූ කරුණු ඇතුළු කරුණු සලකා බැලීමෙන් අනතුරුව සැකකරුවන්ට ඇප ලබාදීම ප්‍රතික්ෂේප කෙරුණා.
ඒ අනුව ශාන්ත ධර්මසිරි සහ ලක්මාල් පද්මකුමාර යන සැකකරුවන් දෙදෙනා ලබන නොවැම්බර් 11 වැනිදා දක්වා යළි රක්ෂිත බන්ධනාගාරගත කිරීමට මහව මහේස්ත්‍රාත් අනුරුද්දිකා සෙනවිරත්න මෙනවිය නියෝග කළා.
සැකකරුවන්ට එරෙහි චෝදනා තහවුරු කිරීම සඳහා විද්‍යාත්මක සාක්ෂි, රස පරීක්ෂක වාර්තා, වෛද්‍ය විමර්ශන සහ සාක්ෂිකරුවන්ගේ ප්‍රකාශ ඉදිරියේදී වැදගත් වනු ඇත. ඒ සමඟම විත්තිය විසින් මතුකර ඇති විමර්ශනවල ස්වාධීනත්වය සහ සාක්ෂිවල ප්‍රමාණවත්භාවය පිළිබඳ ප්‍රශ්න ද අධිකරණය හමුවේ තවදුරටත් සලකා බැලීමට සිදුවනු ඇත. කාවන්තිස්ස ඇතාගේ මරණයට වගකිවයුත්තන් කවුරුන්ද යන්නත්, ඇතාට ප්‍රතිකාර කිරීමේ ක්‍රියාවලියේදී කිසියම් අක්‍රමිකතාවක් සිදුවී ඇත්ද යන්නත් තීරණය වන්නේ ඉදිරි විමර්ශන හා අධිකරණ ක්‍රියාවලිය තුළිනි.
