බන්ධනාගාර තදබදය අවම කිරීමට රස පරීක්ෂක වාර්තා කඩිනම් කිරීම ඇතුළු පියවර රැසක් සම්බන්ධයෙන් රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ අවධානය යොමුව තිබෙනවා.
බන්ධනාගාරවල පවතින අධික තදබදය අවම කිරීම සඳහා රක්ෂිත බන්ධනාගාරගතව සිටින සැකකරුවන්ගේ රස පරීක්ෂක වාර්තා කඩිනමින් ලබාදීම, සුළු මත්ද්රව්ය වැරදි සම්බන්ධයෙන් අත්අඩංගුවට ගන්නා පුද්ගලයන් පුනරුත්ථාපනයට යොමු කිරීම සහ දුරස්ථ තාක්ෂණය ඔස්සේ අධිකරණ කටයුතු සිදු කිරීම ඇතුළු ක්රියාමාර්ග කඩිනමින් ක්රියාත්මක කිරීමේ අවශ්යතාව ද පසුගිය දා රැස්වූ එම කාරක සභාවේ අවදානයට යිමු කෙරුණා.
බන්ධනාගාරවල පවතින අධික තදබදයට, වරදකරුවන් වූ සිරකරුවන්ට වඩා රක්ෂිත බන්ධනාගාරගතව සිටින සැකකරුවන්ගේ සංඛ්යාව විශාල වශයෙන් බලපාන බව මෙහිදී පෙන්වා දෙනු ලැබුවා.
විශේෂයෙන් මත්ද්රව්ය චෝදනා සම්බන්ධයෙන් අත්අඩංගුවට ගන්නා සැකකරුවන්ගේ රස පරීක්ෂක වාර්තා ප්රමාද වීම හේතුවෙන් ඔවුන්ට ඇප ලබාගැනීමට නොහැකිව දීර්ඝ කාලයක් රක්ෂිත බන්ධනාගාරගතව සිටීමට සිදුවන බව ද මෙහිදී
අනාවරණය වුණා.
එසේම ඇතැම් සැකකරුවන් මාස 18 සිට වසර 02 දක්වා කාලයක් රස පරීක්ෂක වාර්තා නොමැතිව රක්ෂිත බන්ධනාගාරගතව සිටින බව ද මෙහිදී පැමිණි නිලධාරීන් විසින් පෙන්වා දෙනු ලැබුවා.
මේ අතර, කුඩා මත්ද්රව්ය ප්රමාණ සමඟ අත්අඩංගුවට ගන්නා මත්ද්රව්ය භාවිතයට ඇබ්බැහි වූ පුද්ගලයන් සෘජුවම බන්ධනාගාරගත කිරීම වෙනුවට වෛද්ය පරීක්ෂණයකින් අනතුරුව පුනරුත්ථාපන මධ්යස්ථාන වෙත යොමුකළ හැකි වන පරිදි නීතිමය සංශෝධන සිදු කිරීමේ අවශ්යතාව ද සාකච්ඡා කෙරුණා.
අන්තරායකර ඖෂධ පාලක ජාතික මණ්ඩලය යටතේ පවතින පුනරුත්ථාපන මධ්යස්ථාන හා පුහුණු පහසුකම් පුළුල් කිරීමේ
අවශ්යතාව ද මෙහිදී කාරක සභාව කියා සිටියා.
වසර හතරකට අඩු දඬුවම් ලැබූ සිරකරුවන් සහ දඩ මුදල් ගෙවාගත නොහැකිව සිටින සුළු වැරදිකරුවන් සේවා හෝ වැඩ කඳවුරු වෙත හෝ යොමු කිරීමේ හැකියාව පිළිබඳව ද මෙහිදී අවධානය යොමු වුණා.
සුළු වැරදි සම්බන්ධයෙන් ඇප මුදල් තබා ගත නොහැකිව සිටින පුද්ගලයන්ගේ නඩු කඩිනමින් අවසන් කර ඔවුන් සුදුසු සේවා
කඳවුරු වෙත යොමු කිරීම මගින් බන්ධනාගාර තදබදය අඩු කළ හැකි බව ද පැමිණි නිලධාරීන් පැවසුවා.
තවද, රැඳවියන් අධිකරණ වෙත භෞතිකව රැගෙන යාම වෙනුවට දුරස්ථ තාක්ෂණය සහ වීඩියෝ සම්බන්ධතා ඔස්සේ අධිකරණ කටයුතු සඳහා සම්බන්ධ කිරීමේ අවශ්යතාව ද අවධාරණය කෙරුණා.
දෛනිකව රැඳවියන් අධිකරණ වෙත රැගෙන යාමේදී බන්ධනාගාර නිලධාරීන් විශාල සංඛ්යාවක් යෙදවීමට සිදුවන බැවින්, මෙම ක්රමය ක්රියාත්මක කිරීමෙන් නිලධාරී හිඟය මෙන්ම ආරක්ෂක අවදානම ද අවම කරගත හැකි බව පැමිණි නිලධාරීන් ප්රකාශ කළා.
ඒ, සඳහා අවශ්ය නීතිමය සංශෝධන කඩිනම් කිරීමේ අවශ්යතාව ද මෙහිදී සාකච්ඡා වුණා.
වයෝවෘද්ධ, පූර්ණ ආබාධිත සහ දීර්ඝකාලීනව වෛද්ය ප්රතිකාර අවශ්ය සිරකරුවන් සම්බන්ධයෙන්ද අවධානය යොමු වූ අතර, වෛද්ය මණ්ඩලයක නිර්දේශ මත පවතින නීතිමය ක්රමවේදයන්ට අනුව ඔවුන් නිදහස් කිරීමේ හැකියාව පිළිබඳව සලකා බැලීමේ අවශ්යතාව ද මෙහිදී අවධානයට ලක් වුණා.
මේ අතර, වයස අවුරුදු පහට අඩු දරුවන් සමඟ බන්ධනාගාරගතව සිටින මව්වරුන්ගේ නඩු කඩිනමින් අවසන් කිරීම සඳහා විශේෂ අධිකරණ ක්රමවේදයක් හඳුන්වාදීමේ යෝජනාවක් ද මෙහිදී ඉදිරිපත් වුණා.
එම මව්වරුන් සිරකාරියන් සහ රක්ෂිත බන්ධනාගාරගතව සිටින සැකකාරියන් යන දෙපිරිසෙන්ම සමන්විත වන අතර, කුඩා
දරුවන් බන්ධනාගාර පරිසරය තුළ දීර්ඝ කාලයක් ගත කිරීම ඔවුන්ගේ අනාගත වර්ධනයට අහිතකර බලපෑම් ඇති කළ හැකි බැවින්, නඩු කඩිනමින් විභාග කර දඬුවම් නියම කිරීම හෝ නිදහස් කිරීමේ ක්රමවේදයක් හෝ අවශ්ය බව පැමිණි නිලධාරීන්
පෙන්වා දුන්නා.
බන්ධනාගාර පද්ධතියේ යටිතල පහසුකම් පිළිබඳව ද කාරක සභාවේදී අවධානය යොමු වූ අතර, බන්ධනාගාරවල පැරණි හා අබලන් ගොඩනැගිලි කඩිනමින් අලුත්වැඩියා කර භාවිතයට ගැනීමේ අවශ්යතාව සාකච්ඡා වුණා.
මිල්ලෑව/හොරණ නව බන්ධනාගාර සංකීර්ණය ඉදිකිරීම, බන්ධනාගාර පහසුකම් පුළුල් කිරීම සහ පවතින බන්ධනාගාර ධාරිතාව උපරිමයෙන් භාවිත කිරීම පිළිබඳව ද අවධානය යොමු වුණා.
එමෙන්ම, අධික තදබදයක් පවතින බන්ධනාගාරවල රැඳවියන් සාපේක්ෂව තදබදය අඩු බන්ධනාගාර වෙත මාරු කිරීමේ හැකියාව පිළිබඳව ද සාකච්ඡා කෙරුණා.
බන්ධනාගාර නිලධාරීන්ගේ හිඟය සම්බන්ධයෙන් ද කාරක සභාවේ අවධානය යොමු වූ අතර, අධිකරණ කටයුතු සඳහා රැඳවියන් ප්රවාහනය කිරීමේදී සහ රෝහල්ගත රැඳවියන් සඳහා ආරක්ෂාව සැපයීමේදී විශාල නිලධාරී පිරිසක් යෙදවීමට සිදුවීම නිලධාරී හිඟය තවදුරටත් උග්ර කරන බව ද අනාවරණ වුණා.
ඒ අනුව, දුරස්ථ අධිකරණ ක්රමවේදය ක්රියාත්මක කිරීම මෙන්ම රෝහල්වල රැඳවියන් සඳහා වෙන්කර ඇති විශේෂ වාට්ටු
නැවත සක්රීය කිරීමේ අවශ්යතාව ද සාකච්ඡා වුණා.
බාහිර ආරක්ෂාව සඳහා අවශ්ය අවස්ථාවලදී පොලිසියේ සහ ත්රිවිධ හමුදාවේ සහාය ලබා ගැනීම, බන්ධනාගාර නිලධාරීන්ගේ උසස්වීම් හා වැටුප් විෂමතා ඇතුළු වෘත්තීය ගැටලු විසඳීම සහ ඔවුන්ට එල්ල වන ජීවිත තර්ජන සම්බන්ධයෙන් අවශ්ය ආරක්ෂක පියවර ගැනීම පිළිබඳව ද කාරක සභාවේදී අවධානය යොමු කෙරුණා.
අවසානයේදී, බන්ධනාගාර තදබදය අවම කිරීම සමඟම සමාජගත වන පුද්ගලයන් නැවත වැරදිවලට යොමුවීම වැළැක්වීම සඳහා ප්රජා පාදක විශෝධන සහ පසු විපරම් ක්රමවේද ශක්තිමත් කිරීමේ වැදගත්කම ද කාරකසභාවේදී අවධාරණය කරනු ලැබුවා.
