විනිසුරුවරුන්ගේ විශ්රාම වයස දීර්ඝ කිරීමේ යෝජනාව සම්බන්ධයෙන් ජනාධිපතිවරයා වෙත සිය ස්ථාවරය පෙන්වා දුන් බවත්, විනිසුරුවරුන්ගේ විශ්රාම වයස දීර්ඝ කිරීම වැනි තීරණයක් ගැනීමට පෙර පුළුල් ලෙස සාකච්ඡාවන්ට භාජනය කළ යුතු බවටත් ජනාධිපතිවරයාට දැන්වූ බවත් ශ්රී ලංකා නීතිඥ සංගමය පවසනවා.
එම සංගමයේ සභාපති රජිව් අමරසූරිය සඳහන් කළේ එහිදී ඒ සම්බන්ධයෙන් ජනාධිපතිවරයා ද කරුණු පැහැදිලි කිරීමක් සිදු කළ බවයි.
විනිසුරුවරුන්ගේ විශ්රාම වයස දීර්ඝ කිරීමේ යෝජනාව සම්බන්ධයෙන් සාකච්ඡාවක් පැවැත්වීම සඳහා අද (12) ශ්රී ලංකා නීතිඥ සංගමය විසින් ජනාධිපතිවරයාව හමුවුණා.
එහිදී සාකච්ඡාව අවසන්ව පිටතට පැමිණීමෙන් පසු ශ්රී ලංකා නීතිඥ සංගමයේ සභාපතිවරයා මේ බව සඳහන් කළා.
”අපි එතුමාට පැහැදිලි කළා අපේ ස්ථාවරය, එතුමත් එතුමාගේ ස්ථාවරය කිව්වා. අපි අන්තිමට ඉල්ලීමක් කළා මේ වගේ වෙනස්කමක් කරනකොට පුළුල් විද්වත් සාකච්ඡාවකින් පසුව තමයි අවශ්ය පියවර ගත යුත්තේ කියලා” යැයි අදහස් දක්වමින් ඔහු සඳහන් කළා.
