පොලිස්පතිවරයාගේ නිල නිවස හා අගවිනිසුරුවරයාගේ නිල නිවස අවට මාර්ගය වීඩියෝ ගතකළ පුද්ගලයෙක් පොලීසිය විසින් අත්අඩංගුවට ගෙන තිබෙනවා.
කුරුඳුවත්ත පොලීසිය විසින් මෙම සැකකරුව වීඩියෝ ගතකිරීමට යොදාගත් ජංගම දුරකථනය සමඟ ඊයේ (06) රාත්‍රියේ අත්අඩංගුවට ගෙන ඇති බවයි වාර්තා වන්නේ.
පොලිස්පතිවරයාගේ නිල නිවසේ ප්‍රධාන දොරටුවේ රාජකාරී යෙදී නිලධාරියෙක් ලබා දුන් තොරතුරක් මත මෙම සැකකරු අත්අඩංගුවට ගෙන තිබෙනවා.
අදාල නිලධාරියා රාජකාරීයේ යෙදී සිටින අතරතුර මෝටර් රථයකින් පැමිණි පුද්ගලයෙක් පොලිස්පතිවරයාගේ නිල නිවස අසල මාර්ගය වීඩියෝ වීඩියෝ ගත කරන බවට නිරීක්ෂණය වී ඇති අතර, ඒ අනුව අදාළ නිලධාරියා ඒ සම්බන්ධයෙන් ආසන්නයේ රථ වාහන රාජකාරියේ යෙදී සිටි පොලිස් කොස්තාපල්වරයෙක් දැනුවත් කර තිබුණා.
පසුව කොළඹ හදිසි ඇමතුම් අංශයට දැනුම් දීමෙන් අනතුරුව කුරුඳුවත්ත පොලිසි ස්ථානයේ රාත්‍රී ජංගම සංචාරක රාජකාරී යෙදී සිටි පොලිස් නිලධාරීන් කණ්ඩායමක් පැමිණ සැකකරුව අත්අඩංගුවට ගෙන තිබෙනවා.
පසුව සැකකරුගේ ජංගම දුරකථනය ගෙන පරික්ෂා කිරීමේදී පොලිස්පතිවරයාගේ නිල නිවස අවට මෙන්ම අගවිනිසුරුතුමාගේ නිල නිවස අවට ද ඒ අයුරින් වීඩියෝ ගත කර තිබුණා.
සැකකරු අළුබෝමුල්ල ප්‍රදේශයේ පදිංචි සැකකරු 40 හැවිරිදි අයෙක්.
කුරුඳුවත්ත පොලීසිය වැඩිදුර විමර්ශන සිදු කරනු ලබනවා.
