අවුරුදු කුමාරි තරගයක දී ආරක්ෂිත වන සත්වයෙකු වන පිඹුරෙකු සමඟ නර්තනය කිරීම සම්බන්ධයෙන් තරුණියකට කොළඹ ප්රධාන මහෙස්ත්රාත් අධිකරණය රුපියල් 50,000ක දඩයක් නියම කර තිබෙනවා.
සමාජ මාධ්ය තුළ දැඩි අවධානයට ලක් වූ මෙම සිද්ධිය සම්බන්ධයෙන් වනජීවී සංරක්ෂණ දෙපාර්තමේන්තුවේ කොළඹ දිස්ත්රික් වනජීවී කාර්යාලය විමර්ශන සිදුකර ඇති අතර, පිඹුරා මුදලට ලබාදුන් පුද්ගලයා සහ තරුණිය, වන සත්ව හා වෘක්ෂලතා ආරක්ෂක ආඥා පනත යටතේ අත්අඩංගුවට ගෙන අධිකරණයට ඉදිරිපත් කර තිබුණා.
ඉකුත් ජූලි 22 වැනිදා නඩුව කැඳවූ අවස්ථාවේ දී දෙදෙනාම වරද පිළිගෙන ඇති අතර, ආරක්ෂිත වන සත්වයෙකු රඳවා තබාගෙන නර්තනය සඳහා යොදා ගැනීමේ වරදට තරුණියට රුපියල් 50,000ක දඩයක් නියම කෙරුණා.
එමෙන්ම, පිඹුරා මුදලට අලෙවි කිරීම සහ නීතිවිරෝධී ලෙස රඳවා තබා ගැනීමේ චෝදනාවට අනෙක් සැකකරුට රුපියල් 100,000ක දඩයක් නියම කර තිබෙනවා.
වනජීවී සංරක්ෂණ දෙපාර්තමේන්තුව වෙනුවෙන් කොළඹ දිසා වන සත්ව අඩවි ආරක්ෂක කාර්යාලයේ ස්ථාන භාර නිලධාරී එම්.පී.සංජීව අධිකරණයට කරුණු දැක්වූවා
ඔහු අවධාරණය කළේ ආරක්ෂිත වන සතුන් රඳවා තබා ගැනීම, ප්රවාහනය කිරීම, ප්රදර්ශනය කිරීම හෝ අලෙවි කිරීම නීතියෙන් තහනම් වන අතර, එවැනි ක්රියාවල නිරත වන පුද්ගලයන්ට එරෙහිව දැඩි නීතිමය පියවර ගත යුතු බවයි.
එහිදී සැකකරුවන් දෙදෙනාම වරද පිළිගත් අතර එහිදී අධිකරණය දඩ නියම කළා.
නර්තනයේ යෙදුනු තරුණිය දඩ මුදල එදින ගෙවීමට කටයුතු කළත්, පිඹුරා අලෙවි කළ පුද්ගලයාට දඩය ගෙවීමට නොහැකි වු නිසා රක්ෂිත බන්ධනාගාරගත කෙරුණා.
පසුව, දින දෙකකට පසු ඔහු දඩය ගෙවා නිදහස් වී තිබෙනවා.
