හිටපු බුද්ධි ප්‍රධානී සුරේෂ් සලේට ජාතික රෝහල තුළ දී අවශ්‍ය ආරක්ෂාව ලබා දී ඇති බවට ආරක්ෂක අංශ ප්‍රකාශ කළ බව
කැබිනට් ප්‍රකාශක, අමාත්‍ය නලින්ද ජයතිස්ස පවසනවා.
රජයේ ප්‍රවෘත්ති දෙපාර්තමේන්තුවේ අද (16) පැවැති කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍යවරයා මේ බව සඳහන් කර සිටියා.
මේ අතර රැඳවුම් භාරයේ පසුවන සුරේෂ් සලේ රඳවා තබා ඇති පරිසරය සම්බන්ධයෙන් ද අමාත්‍යවරයා කැබිනට් මාධ්‍ය හමුවේදී කරුණු පැහැදිලි කළා.
එහිදී අමාත්‍යවරයා සඳහන් කළේ සුරේෂ් සලේ වෙනුවෙන් කිසිදු විශේෂ සිරකුටියක් හෝ විශේෂ පහසුකම් සලසා නොමැති බවයි.
මීට පෙර පැවැති ආණ්ඩුවල රැඳවුම් නියෝග මත පුද්ගලයන් රඳවා තැබූ සාමාන්‍ය ක්‍රමවේදයම ඔහු වෙනුවෙන් ද ක්‍රියාත්මක බවයි අමාත්‍ය නලින්ද ජයතිස්ස වැඩිදුරටත් පැවසුවේ .
මේ අතර පාස්කු ඉරුදින ත්‍රස්ත ප්‍රහාරය වෙනුවෙන් සාධාරණය ඉටු කිරීම සඳහා, සුරේෂ් සලේට කළ හැකි නිවැරදිම දෙය වන්නේ තමන් සතු සියලු තොරතුරු හෙළිකරමින් විමර්ශනවලට සහායවීම බව අමාත්‍යවරයා මෙහිදී සඳහන් කර සිටියා.
හිටපු බුද්ධි නිලධාරියෙකු සහ හමුදා නිලධාරියෙකු ලෙස ඔහු දන්නා තොරතුරු සඟවාගෙන සිටීමෙන් කිසිදු පලක් නොවන බවයි අමාත්‍යවරයා පැවසුවේ.
“බුද්ධි නිලධාරියෙක් හැටියට හා හමුදා නිලධාරියෙකු හැටියට සුරේෂ් සලේ මහතාට කළ හැකි හොඳම දේ තමයි පාස්කු ඉරුදින ප්‍රහාරය සම්බන්ධයෙන් ඔහු දන්නා දේවල් ප්‍රකාශයට පත්කිරීම. ආරක්ෂක අංශවලට සහාය ලබාදීම. එහෙම නැතුව අපරාධ පරීක්ෂකයා මාරු කිරීම සඳහා අරගල කිරීම නොවෙයි. තමන්ගේ ලැප් එකේ හෝ ෆෝන් එකේ හෝ තිබෙන තොරතුරු ලබාදෙන්න. ඒක හංගන් හිටියට තේරුමක් නෑ”
