අනතුරට පත් ඉරාන නෞකාවේ සිටි 30 දෙනෙක් කරාපිටිය රෝහලට

මෙරටට ආසන්න මුහුදු සීමාවක, ඉරාන නාවික හමුදාවට අයත් නෞකාවක්, ගිලෙමින් පවතින බවට අද (04) උදැසන නාවික හමුදාව සහ වෙරළ ආරක්ෂක දෙපාර්තමේන්තුවට පණිවිඩ ලැබුණු බවත් ඒ අනුව ක්‍රියාත්මක වූ නාවික හමුදාව සහ ගුවන් හමුදාව, ඒකාබද්ධ මෙහෙයුමක් ක්‍රියාත්මක කළ බවත් අමාත්‍ය විජිත හේරත් පවසනවා.

ඒ අනුව එම නෞකාවේ සිටි තුවාල ලැබූ 30 දෙනෙක් කරාපිටියට රෝහලට රැගෙන ඒමට කටයුතු කළ බවයි අමාත්‍යවරයා සඳහන් කළේ.

එමෙන්ම ඒ වන විට එම නෞකාවේ 180 දෙනෙක් පමණ රැඳී සිට ඇති බවත් අමාත්‍යවරයා පෙන්වා දුන්නා.

කෙසේ වෙතත් එම නෞකාව අනතුරට පත්ව ඇත්තේ ශ්‍රී ලංකාවට අයත් මුහුදු සීමාවේ නොවන බවත් අමාත්‍යවරයා වැඩිදුරටත් කරුණු සඳහන් කළා.

”අපට අයත් නොවන මුහුදු සීමාවේ ඉරාන නාවික හමුදාවට අයත් නෞකාවක් ගිලිනවා කියන පණිවිඩය අද උදෑසන 05.08ට විතර අපේ නාවික හමුදාවට සහ වෙරළ ආරක්ෂක දෙපාර්තමේන්තුවට පණිවිඩ ලැබුණා. අපි උදේ 06 වෙනකොට මැදිහත් වුණා. ගුවන් හමුදාව සහ නාවික හමුදාව දෙකම මැදිහත්වුණා, 30 දෙනෙක් පමණ දැඩි අනතුරට ලක්වෙලා තියෙනවා. 180ක් විතර නෞකාවේ සිටිය බවට තොරතුරු තියෙනවා. 30 දෙනාගේ ජීවිත බේර ගන්න මේ වෙනකොට කරාපිටිය රෝහලට රැගෙන එනවා.”යැයි අමාත්‍යවරයා සඳහන් කළා.