පාර්ලිමේන්තුවේ හෙට (24) දින දෙවනවර කියවීමේ විවාදයට ගැනීමට නියමිත (19 වන අධිකාරය වූ) දණ්ඩ නීති සංග්රහය (සංශෝධන) පනත් කෙටුම්පත රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාව විසින් සලකා බලා අනුමත කර තිබෙනවා.
ඒ උක්ත කාරක සභාව ගරු පාර්ලිමේන්තු මන්ත්රී නජිත් ඉන්දිකගේ සභාපතිත්වයෙන් අද (23) පාර්ලිමේන්තුවේදී රැස්වූ අවස්ථාවේදීයි.
එහිදී කමිටුවේ සභාපතිවරයා පැවසුවේ දරුවන් ඉලක්ක කරගත් ශාරීරික දඬුවම් සහ සිසුන්ට හානි පමුණුවන දඬුවම් ක්රම අවසන් කිරීම සහ එවැනි අපරාධ සඳහා නීතිමය දඬුවම් ලබා දීමේ අරමුණින් මෙම පනත් කෙටුම්පත හඳුන්වා දී ඇති බවයි.
ළමා රැඳවුම් මධ්යස්ථාන සහ පාසල් ඇතුළු විවිධ ස්ථානවල දරුවන්ට සිදුවන ශාරීරික දඬුවම් නැවැත්වීමට ප්රමාණවත් නීතිමය විධිවිධාන ශ්රී ලංකාවේ දිගු කලක් තිස්සේ නොතිබුණු බවත් මේ සම්බන්ධයෙන් සමාජය තුළ දීර්ඝ කාලයක් තිස්සේ සාකච්ඡා කෙරෙමින් පැවති අතර, තත්ත්වය වෙනස් කිරීම සඳහා නීතිමය විධිවිධාන ගෙන ආ යුතු බවට සාකච්ඡාවට ලක් කෙරුණා.
එනිසාම මෙම ගැටලුව සම්බන්ධයෙන් නීතියක් සම්පාදනය කිරීමේ අවශ්යතාවය විවිධ දේශපාලන පක්ෂ සහ විවිධ ජාත්යන්තර සංවිධාන ඇතුළු විවිධ පාර්ශවයන් විසින් අඛණ්ඩව අවධාරණය කර ඇති බවත් ඒනිසා ඒ සඳහා විධිවිධාන සැලසීම පිණිස දණ්ඩ නීති සංග්රහය සංශෝධනය කරමින් උක්ත පනත් කෙටුම්පත ගෙන එන බවට අධිකරණ හා ජාතික ඒකාබද්ධතා අමාත්යාංශයේ නිලධාරීන් පෙන්වා දුන්නා.
අධ්යාපන අමාත්යාංශය සහ ගුරු වෘත්තීය සමිති ඇතුළු විවිධ පාර්ශවයන් සමඟ කළ පුළුල් සාකච්ඡාවලින් අනතුරුව මෙම පනත් කෙටුම්පත සකස් කළ බවයි කාරක සභාවට සහභාගී වූ අදාළ නිලධාරීන් පවසා සිටියේ.
මෙය කිසිවිටෙකත් ගුරුවරුන් ඉලක්ක කරගත් පනතක් නොවන බවත්, දරුවන්ට ශාරීරිකව දඬුවම් කරන ඕනෑම කෙනෙකුට අදාළ වන නීතියක් බවත් එම නිලධාරීන් මෙහිදී පෙන්වා දුන්නා.
