මාංචු කුට්ටම පිටින් වතුරට පැන්න සැකකරු ගොඩගන්න ගමක් එකතු වෙයි

මිල්ලනීය ප්‍රදේශයේ වෙළඳසැලක් තුළට ඊයේ (27) රාත්‍රියේ ඇතුල් වූ පුද්ගලයෙක්‌ එම වෙළඳසැලෙහි භාණ්ඩ සොරකමේ නිරත වීමේ දී වෙළඳසැල් හිමිකරුට හසු වී තිබෙනවා.

එහිදී වෙළඳසැල් හිමිකරු කෑගැසීම නිසා සොරකමේ පැමිණි පුද්ගලයා විසින් ඔහුට ආයුධයකින් පහර දී පලාගොස් ඇති බවට වාර්තා වනවා.

තුවාල ලැබූ වෙළඳසැල්හිමියා මේ වනවිට පානදුර රෝහලට ඇතුළත් කර ප්‍රතිකාර සිදු කරමින් පවතින බවයි පොලිසිය පවසන්නේ.

අදාළ සොරකම සඳහා පැමිණි සැකකරු අද (28) උදෑසන මිල්ලනීය පොලිසිය විසින් අත්අඩංගුවට ගෙන පොලිසිය වෙතට පොලිස් යතුරුපැදියක් මඟින් රැගෙන එන අතරතුරදී ඔහු විසින් යතුරුපැදිය පැදවූ පොලිස් නිලධාරියාගේ ගෙලට මාංචු යුගළ යොදා ගෙල තදකර යතුරුපැදිය බිමට පෙරලා ගෙන තිබෙනවා.

ඒත් සමඟම අසළ තිබූ කිඹුලන් ගැවසෙන ගැඹුරු වතුර වලකට පැන සැකකරු පලා යාමට උත්සාහ ගත් බව පොලිසිය සඳහන් කරනවා.

නමුත් එම වතුර වල හරහා පැන යාමට නොහැකි වූ සැකකරුව පොලිස් නිලධාරීන්ගේ සහ ගම්වාසීන් එක්ව මහත් පරිශ්‍රමයකින් ගොඩබිමට ගැනීමෙන් පසු ඔහුව මිල්ලනීය පොලිසිය වෙතට රැගෙන ගොස් තිබුණා.