තායිවානය වටා චීනය පවත්වන හමුදා අභ්‍යාස පිළිබඳව ජපාන විදේශ අමාත්‍ය ටකේෂි ඉවායා කනස්සල්ල පළ කර ඇති අතර, තායිවාන් සමුද්‍ර සන්ධියේ සාමය සහ ස්ථාවරත්වය පවත්වා ගැනීමේ වැදගත්කම අවධාරණය කර ඇති බව තායිපේ ටයිම්ස් වාර්තා කරනවා.
ජපන් විදේශ කටයුතු අමාත්‍ය ටකේෂි ඉවායා චීන විදේශ ඇමති වැන්ග් යී සමඟ පැවති හමුවකදී මේ බව පැවසුවා.
“ජපානය ඇතුළු ජාත්‍යන්තර ප්‍රජාවට තායිවාන් සමුද්‍ර සන්ධියේ සාමය සහ ස්ථාවරත්වය වැදගත්” යැයි ක්වාලාලම්පූර් හි පැවති ආසියාන් විදේශ අමාත්‍යවරුන්ගේ රැස්වීම්වලට සමගාමීව පැවති රැස්වීමක දී ඉවායා මේ බව සඳහන් කර තිබෙනවා.
“තායිවානය වටා චීනයේ මහා පරිමාණ හමුදා අභ්‍යාස මෙයට නොගැලපේ” යනුවෙන් ඉවායා පැවසූ බව ජපාන විදේශ කටයුතු අමාත්‍යාංශය ප්‍රකාශ කළා.
තායිපේ ටයිම්ස් පුවත්පතට අනුව, බලහත්කාරයෙන් පවතින තත්ත්වය ඒකපාර්ශ්විකව වෙනස් කිරීමට ගන්නා ඕනෑම උත්සාහයකට ජපානයේ විරුද්ධත්වය ද ඉවායා ප්‍රකාශ කළ අතර දකුණු චීන මුහුදේ තත්ත්වය පිළිබඳව බරපතල කනස්සල්ල පළ කර තිබෙනවා.
