තරුණයෙකුගේ මළසිරුරක් සොයාගෙන තිබෙනවා.
අද (10) පෙරවරුවේ මෙම මළසිරුර සොයාගෙන ඇත්තේ හෝමාගම විකල්ප මාර්ගයේ තිබියදී බවයි දසත ප්‍රාදේශීය වාර්තාකරු පැවසුවේ.
මෙම තරුණයාව වෙනත් ස්ථානයක දී ඝාතනය කර පසුව මෙම ස්ථානයට ගෙනත් දමන්නට ඇති බව පොලිසිය සැක පළ කරනවා.
වයස අවුරුදු 35 ක් පමණ වන මරණකරු මියගොස් ඇත්තේ හිසට ආයුධයකින් එල්ල කළ ප්‍රහාරයක් හේතුවෙන් බවයි පොලිසිය පැවසුවේ.
ඔහුගේ ගෙලෙහි යම් ඉදිමුම් තත්ත්වයක්, ඒ ආසන්නයේ ලේ පැල්ලමක් ද දක්නට ලැබෙන බවත් පොලිසිය පැවසුවා.
මරණකරුගේ සිරුර හමු වූ විකල්ප මාර්ග කොටස මෙතෙක් විවෘත කර නොමැති මාර්ගයක් බවත් ඒ අවට රාත්‍රියේ දී අඳුරුසහගත තත්ත්වයක් පවතින බව ද වාර්තා වනවා.
මළ සිරුර තිබූ ස්ථානයට පැමිණි නුගේගොඩ පොලිස් කොට්ඨාසයේ අපරාධන ස්ථාන පරීක්ෂණ නිලධාරීන් විසින් මූලික පරීක්ෂණ කටයුතු ආරම්භ කර තිබෙන අතර සිද්ධිය සම්බන්ධයෙන් හෝමාගම මූලස්ථාන පොලිසිය වැඩිදුරටත් පරීක්ෂණ පවත්වනවා.
