ජාත්‍යන්තර ක්‍රිකට් පිටියේ විශිෂ්ට විනිසුරුවරයෙකු වූ ෂින්වාරි අභාවප්‍රාප්ත වෙයි

ඇෆ්ගනිස්තානයෙන් බිහි වූ විශිෂ්ට ගණයේ අන්තර්ජාතික ක්‍රිකට් විනිසුරුවරයෙකු සැලකෙන බිස්මිල්ලා ජාන් ෂින්වාරි අභාවප්‍රාප්ත වී තිබෙනවා.

ෂින්වාරි දිගු කලෙක සිට අසනීප තත්ත්වයෙන් පසු වූ බවයි වාර්තා වන්නේ.

ඇෆ්ගනිස්තාන ක්‍රිකට් මණ්ඩලය විසින් ෂින්වාරිගෙ අභාවය පිළිබඳ ව අද (08) නිල වශයෙන් නිවේදනය කළා.

ඔහු මියයන විට 41 වැනි වියෙහි පසුවුණා.

එක්දින තරග 34ක් සහ T 20 තරග 26ක් නියෝජනය කළ බිස්මිල්ලා ජාන් ෂින්වාරි 1984 වර්ෂයේ මාර්තු 14 වැනි දින උපත ලැබුවා.

ඇෆ්ගනිස්ථාන ක්‍රිකට් මණ්ඩලයේ නායකත්වය, කාර්ය මණ්ඩලය සහ සමස්ත ඇෆ්ගන් අටලාන් පවුලම ඇෆ්ගනිස්ථානයේ ප්‍රභූ විනිසුරු මණ්ඩලයේ ගෞරවනීය සාමාජිකයෙකු ලෙසයි ෂින්වාරි සලකන්නේ.

බිස්මිල්ලා ජාන් ඇෆ්ගනිස්ථාන ක්‍රිකට් ක්‍රීඩාවේ ශ්‍රේෂ්ඨ සේවකයකු වූ අතර, ඔහු සිය කැපී පෙනෙන වෘත්තීය ජීවිතය පුරා එක්දින තරග 34ක්, T 20 තරග 26ක්, පළමු පෙළ තරග 31ක්, A කාණ්ඩයේ තරඟ 51ක් සහ දේශීය T20 තරග 96ක් විනිශ්චය කළ බව ද එම නිවේදනයේ දැක්වෙනවා.