මෙරට සහල් මාෆියාව තුරන් කිරීම සඳහා කීරි සම්බා සහල්වලට සමාන GR 11 සහල් ඉන්දියාවෙන් ආනයනය කිරීමට කටයුතු කරන බව වෙළඳ අමාත්‍ය වසන්ත සමරසිංහ පවසනවා.
එලෙස සහල් ආනයන කරමින් ජනතාවට අඩු මිලට සහල් ලබාදීමට කටයුතු කරන බව සඳහන් කළ අමාත්‍යවරයා සහල් මාෆියාවට තවදුරටත් ඉඩදිය නොහැකි බවයි සඳහන් කළේ.
මෙහිදී වැඩිදුරටත් අදහස් දක්වමින් ඔහු සඳහන් කර සිටියේ, ආහාර සුරක්ෂිතා කමිටුව විසින් සිදුකළ සොයා බැලීමේ දී කීරි සම්බා වී මෙට්‍රික් ටොන් 85,000ක් ගබඩා 670ක් තුළ පවතින බවට හඳුනාගෙන ඇති බවයි.
ඉන් පොළොන්නරුවේ පවතින වී මෝල්වල පමණක් කීරි සම්බා වී මෙට්‍රික් ටොන් 75,000ක් පවතින බව අනාවරණය වී ඇති බවයි අමාත්‍යවරයා සඳහන් කළේ.
එලෙස තොග රැස්කරගෙන සිටින පිරිස් විසින් කිරී සම්බා සහල් කිලෝවක් රුපියල් 300ක මුදලකට අලෙවි කිරීමට සැලසුම් කරන බව අමාත්‍ය වසන්ත සමරසිංහ මෙහිදී අනාවරණය කළා.
එම තත්ත්වය පාලනය කිරීමට මෙලෙස ඉන්දියාවෙන් GR 11 සහල් ආනයනය කර කිලෝවක් රුපියල් 250ක මුදලකට ලබාදීමට කටයුතු කරන බවයි ඔහු මෙහිදී වැඩිදුරටත් පැවසුවේ.
