ශ්රී ලංකාව සහ බංග්ලාදේශය අතර පැවැත්වෙන දෙවන ටෙස්ට් ක්රිකට් තරගයේ තුන්වන දිනට අද තරගය නිමාවන විට ශ්රී ලංකාව බංග්ලාදේශ දෙවන ඉනිමට වඩා ලකුණු 96ක් ඉදිරියෙන් සිටිනවා.
අද දිනට තරගය අවසන් වනවිට සිය දෙවන ඉනිම ක්රීඩා කරන බංග්ලාදේශය කඩුලු 06ක් දැවී ලකුණු 115ක් රැස්කරගෙන සිටියා.
නොදැවී කඩුල්ලේ රැඳී සිටින ලිටන් දාස් ලකුණු 13ක් රැස්කරගෙන සිටි අතර, අද දිනයේ යැවූ අවසන් පන්දුවේ දී මෙහිඩි හසන් මිරාස්ගේ කඩුල්ල දවාගන්නට තරිඳු රත්නායකට හැකියාව ලැබුණා.
බංග්ලාදේශ දෙවන ඉනිමේ බිඳ වැටුණු කඩුලු හයෙන් නායක ධනංජය ද සිල්වා සහ ප්රභාත් ජයසූරිය කඩුලු දෙක බැඟින් දවාගැනීමට සමත් වුණා.
තරගයේ තුන්වන දිනය වූ අද (27) දිනට තරගය ආරම්භ කරන විට පළමු ඉනිම ක්රීඩා කරමින් සිටි ශ්රී ලංකාව කඩුලු දෙකක් දැවී ලකුණු 290ක් රැස්කරගෙන සිටි අතර, ශ්රී ලංකා පළමු ඉනිමට තවත් ලකුණු 168ක් එක්වෙද්දී අනෙකුත් කඩුලු 08 බිඳ වැටුණා.
ඒ, අනුව ශ්රී ලංකාව සිය පළමු ඉනිම අවසන් කළේ බංග්ලාදේශයට වඩා ලකුණු 211ක් ඉදිරියෙන් සිටිමින්.
මේ අතර අද දිනයේ පන්දුවට පහර දෙමින් සිටිය දී ශ්රී ලංකා කඩුලු රකින ක්රීඩක කුසල් මෙන්ඩිස් ආබාධයකට ලක්වුණා.
ආබාධය හේතුවෙන් ඔහුට කඩුලු රැකීම සඳහා බංග්ලාදේශ දෙවන ඉනිමේ දී පිටියට පිවිසියේ නැහැ.
ඔහු දැනට කණ්ඩායමේ භෞත චිකිත්සකවරයාගෙන් ප්රතිකාර ලබමින් සිටින අතර, ඉදිරියේ දී අවශ්ය වුවහොත් මෙන්ඩිස්ව MRI ස්කෑන් පරීක්ෂණයකට යොමු කිරීමට නියමිත බවයි ක්රිකට් ආරංචි මාර්ග පැවසුවේ.
.
