ඉහළ පොළියක් දෙන බවට පවසමින් නේෂන් ලංකා ෆිනෑන්ස් හා සිංහ කැපිටල් ඉන්වෙස්ට්මන්ට් යන මූල්‍ය ආයතන මහජනතාවගෙන් මුදල් ලබාගෙන ඇති අතර මේ සම්බන්ධව මීගමුව මහේස්ත්‍රාත් අධිකරණයේ දී දෙවන වරටත් අප්‍රේල් මස 07 වැනි දා විභාගයට ගැනුණා.
එහිදී මෙම මුදල් වංචාව සම්බන්ධයෙන් පැමිණිලි කළ පළමු තැන්පතුකරුවන් 17 දෙනාට රුපියල් කෝටි 14ක්, 70 ලක්ෂයක පමණ මුදලක් වාරික 03ක් යටතේ ගෙවා නිම කිරීමට මූල්‍ය ආයතනයේ අධ්‍යක්ෂවරයා වෙනුවෙන් පෙනී සිටි නීතිඥයා කැමැත්ත පළකර සිටි බවයි වාර්තා වන්නේ.
මෙම සිදුවීම සම්බන්ධයෙන් පසුගිය මාර්තු 27 වැනි දින සිට අප්‍රේල් 07 දක්වා රක්ෂිත බන්ධනාගාරගත කර සිටි නේෂන් ලංකා ආයතනයේ කෝසල සුරංග නමැති අධ්‍යක්ෂවරයා ව රුපියල් ලක්ෂ 100 බැගින්, එනම් රුපියල් කෝටිය බැගින් වන ශරීර ඇප 02ක් යටතේ මුදාහැරීමට ද අධිකරණය විසින් නියෝග කරනු ලැබුවා.
නේෂන් ලංකා ආයතනයේ ප්‍රධානියා වන වික්ටර් රමනන් නමැති පුද්ගලයා ද්විත්ව පුරවැසිභාවය ලබන බ්‍රිතාන්‍ය පුරවැසියෙකු වන අතර එවැනි ද්විත්ව පුරවැසියෙකු ලංකාවේ ප්‍රධාන මූල්‍ය ආයතනයක සභාපතිත්වය දැරීම ගැටළුසහගත බවත් වාර්තා වනවා.
ශ්‍රී ලංකාවේ මූල්‍ය පද්ධතිය සම්බන්ධව තැන්පතුකරුවන්ට මෙවැනි සිද්ධීන් හරහා ගැටලුකාරී තත්ත්වයක් මතුවන අතර ශ්‍රී ලංකා මහ බැංකුවේ අවධානය මේ සම්බන්ධයෙන් යොමු වීම වටිනා කාරණයක් බවයි නිවේදනයේ දැක්වෙන්නේ.
