රුපියල් හැත්තෑ දෙලක්ෂයක් වටිනා විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙනවිත්, කටුනායක ගුවන් තොටුපොළෙන් පිටකර ගෙන යමින් සිටි ගුවන් මගීන් දෙදෙනෙකු අද (24) දින අලුයම ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් පිරිසක් විසින් අත්අඩංගුවට ගනු ලැබුවා.
දසත ගුවන්තොටුපොළ වාර්තාකරු පැවසුවේ මොවුන් දෙදෙනාගෙන් එක් අයෙකු කෑගල්ල ප්‍රදේශයේ පදිංචි 22 හැවිරිදි වියේ පසුවන්නෙකු වන අතර අනෙක් පුද්ගලයා ගම්පහ, ගනේමුල්ල ප්‍රදේශයේ පදිංචි 24 හැවිරිදි අයෙක් බවයි.
සැකකරුවන් දෙදෙනාම මෙරට රියැදුරු වෘත්තියේ යෙදුණු පුද්ගලයින් දෙදෙනෙක්.
මොවුන් අද අලුයම 02.45ට සාජා නුවර සිට ගල්ෆ් ගුවන් සේවයේ 8 ඩී.- 9587 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියා.
ඔවුන් විසින් රැගෙන ආ ගමන් මළු 04 තුළ විදේශීය නිෂ්පාදිත ප්ලැටිනම් වර්ගයේ දුම්වැටි 48,000ක් අඩංගු දුම්වැටි කාටූන් 240ක් සඟවා ගෙන සිටියදී, පොලිස් මත්ද්‍රව්‍ය කාර්යාංශයේ නිලධාරීන් විසින් අත්අඩංගුවට ගනු ලැබුවා.
මේ වනවිට සැකකරුවන් දෙදෙනා පොලිස් ඇප මත මුදාහැර ඇති අතර, ඔවුන් හෙට (25) දින දුම්වැටි තොගයත් සමග මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
