77 වන නිදහස් දිනයට සමගාමී ව බන්ධනාගාර රැඳවියන්ට විශේෂ රාජ්‍ය සමාවක් පිරිනමා තිබෙනවා.
ජනාධිපති අනුර කුමාර දිසානායක මහතා විසින් මෙම රාජ්‍ය සමාව පිරිනමා ඇති බවයි බන්ධනාගාර මාධ්‍ය ප්‍රකාශක ගාමිණී බී. දිසානායක මහතා පැවසුවේ.
ආණ්ඩුක්‍රම ව්‍යවස්ථාවේ 34 (1) වගන්තිය ප්‍රකාරව මෙම බලය ජනාධිපතිවරයා විසින් භාවිත කරනු ලබනවා.
මෙවර ජාතික නිදහස් දිනය වෙනුවෙන් බන්ධනාගාර රැඳවියන් 285 දෙනෙකුට සමාව හිමිවන අතර ඉන් කාන්තා රැඳවියන් සයදෙනෙකුත්, පිරිමි රැඳවියන් 279 දෙනෙකුත් සිටින බවයි වාර්තා වන්නේ.
හෙට (04) දහවල් කාලයට ප්‍රථම සියලු බන්ධනාගාරවලින් මෙම පිරිස මුදා හැරීමට පියවර ගැනෙන බවයි.
ඒ අනුව වාරියපොළ බන්ධනාගාරයෙන් 33 දෙනෙකුත්, මහර බන්ධනාගාරයෙන් රැඳවියන් 31 දෙනෙකුත්, අනුරාධපුර බන්ධනාගාරයෙන් රැඳවියන් 22 දෙදෙනකුත්, වැලිකඩ බන්ධනාගාරයෙන් රැඳවියන් 15 දෙනෙකුත්ථ හෙට දිනයේ දී නිදහස ලබා පිටව යාමට සූදානමින් සිටිනවා.
මීට අමතර ව 77 වන නිදහස් දිනයට සමගාමී ව පෙබරවාරි 04 වැනි දින විශේෂ අමුත්තන් පෙන්වීමේ වැඩසටහනක් බන්ධනාගාර රැඳවියන් වෙනුවෙන් පිරිනමා තිබෙනවා.
එහිදී රැඳවියන්ගේ ඥාතීන් හට විවෘත නැරඹීමක්, මුණගැසීමක් පූර්ණ ආරක්ෂාව යටතේ සිදු කිරීමට අවස්ථාව ලබා දී තිබෙනවා.
