ශ්‍රී ලංකා – අමෙරිකා එක්සත් ජනපද පාර්ලිමේන්තු මිත්‍රත්ව සංගමයේ සභාපති ධුරයට කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය අනිල් ජයන්ත මහතා තේරී පත් ව තිබෙනවා.
ඒ දසවන පාර්ලිමේන්තුව සඳහා ශ්‍රී ලංකා – අමෙරිකා එක්සත් ජනපද පාර්ලිමේන්තු මිත්‍රත්ව සංගමයේ පළමු රැස්වීම කථානායක ජගත් වික්‍රමරත්න මහතාගේ ප්‍රධානත්වයෙන් පසුගියදා (24) පාර්ලිමේන්තුවේ දී පැවැත්වුණු අවස්ථාවේදීයි.
මෙහිදී පාර්ලිමේන්තු මන්ත්‍රී හර්ෂණ රාජකරුණා මහතා එම සංගමයේ ලේකම්වරයා ලෙස තේරී පත් වූ අතර මෙම අවස්ථාව සඳහා මෙරට අමෙරිකා එක්සත් ජනපද තානාපතිනි ජුලී චන්ග් මහත්මිය ද එක් ව සිටියා.
මෙහිදී අදහස් දැක්වූ කථානායක ජගත් වික්‍රමරත්න මහතා ශ්‍රී ලංකාව සහ අමෙරිකා එක්සත් ජනපදය අතර පවතින දිගුකාලීන හා ශක්තිමත් ද්විපාර්ශ්වික සම්බන්ධතාව ශ්‍රී ලංකාවේ වැදගත්ම විදේශ සබඳතාවක් ලෙස අවධාරණය කළා.
ප්‍රජාතන්ත්‍රවාදය ගරු කරන ජාතීන් ලෙස, දෙරට අතර ද්විපාර්ශ්වික සම්බන්ධතා ගොඩනැගී ඇත්තේ ප්‍රජාතන්ත්‍රවාදී පාලන ක්‍රමයේ පරමාදර්ශී ශක්තිමත් කිරීම සඳහා වන කැපවීම් මත බව ද ඔහු සඳහන් කළා.
එමෙන්ම ශ්‍රී ලංකාව – අමෙරිකා එක්සත් ජනපදය අතර ද්විපාර්ශ්වික සබඳතා, දේශපාලන, ආර්ථික, ආරක්ෂක, බුද්ධි තොරතුරු හුවමාරුව, අධ්‍යාපනය සහ දෙරටේ පුරවැසියන් අතර සම්බන්ධතා ඇතුළු විවිධ ක්ෂේත්‍ර ගණනාවක් ආවරණය කරන බව ද කථානායකවරයා පැවසුවා.
ජාත්‍යන්තර සංවර්ධනය සඳහා වූ එක්සත් ජනපද නියෝජිතායතනය (USAID) මගින් අමෙරිකා එක්සත් ජනපදය මෙරටට ලබා දෙන සහාය පිළිබඳව ද කථානායකවරයා සිය කෘතඥතාව පළ කළා.
