කොළඹ පිහිටි අමෙරිකා එක්සත් ජනපද තානාපති කාර්යාලයේ ආරක්ෂක උපදේශක, ලුතිනන් කර්නල් අන්තෝනි සී. නෙල්සන් (Anthony C. Nelson) ඇතුළු නිලධාරීන් පිරිසක් ඊයේ (29) දින නියෝජ්‍ය ආරක්ෂක අමාත්‍ය
(විශ්‍රාමික) මේජර් ජෙනරල් අරුණ ජයසේකර මහතා හමුවුණා.
ආරක්ෂක අමාත්‍යාංශය නිවේදනය කළේ සිය කාර්යාලයට පැමිණි අමෙරිකානු දූත පිරිස නියෝජ්‍ය අමාත්‍යවරයා විසින් ඉතා උණුසුම් අයුරින් පිළිගැනීමෙන් අනතුරුව ඔවුන් සමඟ පැවතී සාකච්ජාවේ දී ශ්‍රී ලංකාවේ ආරක්ෂක අංශවල හැකියාවන් ඉහළ නැංවීම සඳහා අමෙරිකා එක්සත් ජනපද රජය මගින් ලබාදෙන සහයෝගය අගය කරන බවයි.
ඒ වෙනුවෙන් රජය වෙනුවෙන් නියෝජ්‍ය ආරක්ෂක අමාත්‍යවරයා සිය කෘතඥතාවය ද පළ කළා.
මෙහිදී දෙරට අතර ආරක්ෂක සහයෝගීතාව මෙන්ම, දිගුකාලීන සුහදත්වය සහ අන්‍යෝන්‍ය අවබෝධය තුළින් ඇති වී තිබෙන ශක්තිමත් සහ කල්පවත්නා බැඳීම් පිළිබඳව ද දෙපාර්ශ්වයේ නිලධාරීන් අදහස් හුවමාරු කර ගත්තා.
මෙම හමුව ඔස්සේ ශ්‍රී ලංකාව සහ අමෙරිකා එක්සත් ජනපදය අතර පවතින ශක්තිමත් සහ වටිනා සහ සම්බන්ධතාව යළිත් තහවුරු කිරීමක් ද සිදු කෙරුණා.
