වයස අවුරුදු 19න් පහළ කාන්තා ආසියානු කුසලානය ජයගැනීමට ඉන්දීය කණ්ඩායමට අද (22) හැකියාව ලැබුණා.
ඒ, අවසන් මහා තරගයේ දී බංග්ලාදේශ වයස අවුරුදු 19න් පහළ කාන්තා කණ්ඩායම ලකුණු 41 කින් පරාජය කරමින්.
මැලේසියාවේ ක්වලාලම්පුර් හි දී පැවති මෙම තරගයේ පළමුව පන්දුවට පහරදුන් ඉන්දීය කාන්තා කණ්ඩායම පන්දුවාර විස්ස අවසානයේ කඩුලු 07ක් දැවි ලකුණු 117ක් රැස් කළා.
අනතුරුව ලකුණු 118ක ජයග්‍රාහී ඉලක්කයක් හඹා ගිය බංග්ලාදේශ ක්‍රීඩිකාවන්ට පන්දුවාර 18යි පන්දු 03ක් අවසානයේ සියල්ල දැවී රැස්කරගත හැකි වුයේ ලකුණු 76ක් පමණයි.
මැලේසියාවේ සත්කාරකත්වයෙන් පැවති මෙවර තරගාවලිය සඳහා ශ්‍රී ලංකාව ඇතුළු කණ්ඩායම් 16ක් එක්ව සිටියා.
මෙවර තරගවලියේ සුපිරි හතර දෙනාගේ වටයට පිවිසි ශ්‍රී ලංකා වයස අවුරුදුන් 19න් පහළ කාන්තා කණ්ඩායමට හැකියාව ලැබුණත් අවසන් පූර්ව තරගයේ දී ඉන්දියාව හමුවේ ලැබූ පරාජයත් සමඟ අවසන් මහා තරගයට සුදුසුකම් ලබාගැනීමට නොහැකි වී ගියා.
