ප්‍රමිතියෙන් තොර හියුමන් ඉමියුනොග්ලොබියුලින් එන්නත් කුප්පි මිල දී ගැනීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කර සිටින සමාගම් සැපයුම්කරු වන සුදත් ජානක ප්‍රනාන්දු මහරගම අපේක්ෂා රෝහලේ විශේෂඥ වෛද්‍යවරුන් දෙදෙනෙකු වෙත පෙන්වා අධිකරණයට වාර්තාවක් ගොනු කරන ලෙස මාලිගාකන්ද මහේස්ත්‍රාත් ලෝචනා අබේවික්‍රම මහත්මිය අද (18) නියෝග කළා.
සැකකරු වෙනුවෙන් පෙනී සිටි නීතිඥවරයා සැකකරු වෛද්‍ය මණ්ඩලයක් වෙත ඉදිරිපත් කළ අවස්ථාවේ පුරස්ථි ග්‍රන්ථ ආශ්‍රිත පිළිකා රෝග තත්ත්වයකින් පෙළෙන බවට නිර්දේශ කර ඊට අදාළ කටයුතු කරන වෛද්‍යවරුන් දෙදෙනෙකු වෙත පෙන්වන ලෙස ඇතත් මේ වන තෙක් අදාළ පියවර ගෙන නැති බව අධිකරණයට කළ දැනුම්දීමෙන් අනතුරුව මහේස්ත්‍රාත්වරිය මෙම නියෝගය සිදු කළ බවයි දසත අධිකරණ වාර්තාකරු පැවසුවේ.
ඒ අනුව අදාළ පිළිකා පරීක්ෂණය කරන ලෙස මහේස්ත්‍රාත්වරිය නියෝග කළ අතර සැකකරු ලබන 2025 වසරේ ජනවාරි මස පළමුවැනි දා තෙක් රක්ෂිත බන්ධනාගාර ගත කරන ලෙස නියෝග කළා.
සැකකරු අධිකරණයට ඉදිරිපත් නොකෙරුණු අතර ස්කයිප් තාක්ෂණය ඔස්සේ නඩු කටයුත්ත සඳහා ඉදිරිපත් වුණා.
අද නීතිපති දෙපාර්තමේන්තුව ද අධිකරණය හමුවේ පෙනී සිටි අතර අපරාධ පරීක්ෂණ දෙපාර්තමේන්තුව විසින් වැඩිදුර වාර්තා අධිකරණයට ඉදිරිපත් කළා.
හිටපු සෞඛ්‍ය ඇමති කෙහෙළිය රඹුක්වැල්ල, හිටපු සෞෟඛ්‍ය ලේකම් ජනක ශ්‍රී චන්ද්‍රගුප්ත, වෛද්‍ය සැපයීම් අංශයේ අධ්‍යක්ෂ, වෛද්‍ය කපිල වික්‍රමනායක, සහකාර අධ්‍යක්ෂ දේව ශාන්ති සොලමන්, ගණකාධිකාරි (සැපයුම්) නෙරාන් ධනංජය සහ යන නිලධාරීන් ඇතුළු දසදෙනකු ඇප මත මුදා හැර සිටිනවා.
දසවන සැකකරුවකු විදේශගතව සිටින බැවින් ඔහු අත්අඩංගුවට ගැනීමට රතු වරෙන්තු නිකුත් කර තිබෙනවා.
සැකකරු වසරකට ආසන්න කාලයක් තවදුරටත් රක්ෂිත බන්ධනාගාරගත ව සිටින බවයි වාර්තා වන්නේ.
