මත්ද්‍රව්‍ය ජාවාරම්කරුවෙකුට අයත් බව කියන නිවසකට අද (18) අලුයම වෙඩි ප්‍රහාර කිහිපයක් එල්ල වී තිබෙනවා.
දසත ප්‍රාදේශීය වාර්තාකරු පැවසුවේ; මෙම සිදුවීම හෝමාගම – පනාගොඩ රණවිරුගම ප්‍රදේශයේ දි සිදු ව ඇති බවයි.
යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් මෙම වෙඩි ප්‍රහාරය එල්ල කර පලා ගොස් ඇති බවට සිදුකළ මූලික විමර්ශනවල දී හෙළි ව තිබෙනවා.
මිලිමීටර් 09 වර්ගයේ උණ්ඩ යෙදිය හැකි පිස්තෝල වර්ගයේ ගිනිඅවියකින් මෙම වෙඩි තැබීම සිදුකර ඇති බවත් එම උණ්ඩ කොපු දෙකක් සහ ජීව උණ්ඩයක් අදාළ නිවස ඉදිරිපිට මාර්ගයේ වැටී තිබිය දී හමු වූ බව ද පොලීසිය පැවසුවා.
විදෙස්ගතව සිටින ප්‍රධානතම මත්ද්‍රව්‍ය ජාවාරම්කරුකුගේ මෙහෙයවීම මත මෙම වෙඩි තැබීම සිදුකර ඇති බවට පොලිසිය සැක පළ කරනවා.
අදාළ නිවසෙහි හිමිකරු විසින් තවත් මත්ද්‍රව්‍ය ජාවාරම්කරුවන් කිහිප දෙනෙකුගෙන් මත්ද්‍රව්‍ය මිල දී ගැනීම මෙම වෙඩි තැබීමට හේතුව බවටයි සැක කරන්නේ.
වෙඩි තැබීමෙන් නිවසේ සිටි කිසිවෙකුට හානි සිදු ව නැහැ.
නිවසේ බිත්තියකට සහ ජනේලයකට වෙඩි පහර දෙකක් එල්ල වී තිබෙනවා.
සිද්ධිය වූ ස්ථානයට පැමිණි නුගේගොඩ පොලිස් කොට්ඨාසයේ අපරාධ ස්ථාන පරීක්ෂණ නිලධාරීන් මේ සම්බන්ධයෙන් පුළුල් විමර්ශනයක් ක්‍රියාත්මක කර තිබෙනවා.
